Shillong, Lber 02
Ka Mawlai SC ka don ha tmier ban rah ïa ka nam lahduh jong ka Shillong Premier League 2024 hadien ba ka la lah ban pynliem noh ïa ka Nongthymmai SC da 6-1 kol ha ka Sngi Saitjaiñ ha SSA Stadium kaba ha First Ground, Polo.
Haba phai sha ka jingïakhun, wat la u Pynshailang Kharduid u la pynkhih jar nyngkong ha ka minute kaba 12 na ka bynta ka Nongthymmai SC, hynrei ka Mawlai SC ka la lah ban pynphai kylla lyngba u Donlad Diengdoh ha ka minute kaba 27 bad ïa ka kol ba ar lyngba u Robertson Khongriah ha ka minute kaba 34 na ka bynta ban tam ar kol ha ka kylla step.
Ka Mawlai SC ka la lah ban thep biang sa saw kol ha ka kylla miet lyngba u Banskhemlang Mawlong ha ka minute kaba 51, u Baiaikara Swer ha ka minute kaba 76 bad u Romarius Laban ha ka minute kaba 86 bad 87.
Lyngba kane ka nam jop, ka Mawlai SC ka la ïoh 44 point bad ban tam da 5 point ïa ka Shillong Lajong FC kaba don ha ka kyrdan ba-ar. Kine ki kynhun ki dang sah sa mar ar sien ïakhun kynthup ka jingïakynduh pyrshah para ma ki.
Ka Mawlai kan ïakhun biang pyrshah ïa ka Laitkor SC ha ka Sngi Ba-ar, bad lada ka lah ban jop ka lad ka la plie ban ïoh ïa ka hat-trick syndon kum ka lahduh ha ka SPL ha kane ka kynti kaba mynta.
Ha kawei pat ka liang ka Nongthymmai ka dang ïai sah ha ka kyrdan khyndai ha ka miej kheiñ point jong ka SPL bad haduh mynta ka sngi kam shym la lah ban pyllait ïalade na ka jingshah pynhiar kyrdan, hynrei ka la shu pynma ïa ka Mawlai lyngba ka jingpynkhih jar nyngkong da u Pynshailang.
Nangta, ka Mawlai SC ka la pyndonkam ïa baroh ki sap kiba don ha ka kti jong ki ban ïakhun tyngeh ha kaba u Donlad Diengdoh u la lah ban pynurlong na ka bynta ban pynïakhaid. Hadien shiteng kynta kane ka kynhun ka la pynbud ïa ka kol ba ar lyngba u Robertson ha kaba u rangapkol ka Nongthymmai u Akash Thapa um shym la lah ban kyrda na ka jingshah thep.
Hadien ba la bteng biang ïa ka jingïakhun jong ka kylla miet, u Banskhem u la ïoh ban thep ha shwa ba u Baïaikara un pynurlong ïa ka Mawlai ban tam da 4-1 kol. Wat la u Akash u la lah ban kyrda na katto-katne ki jingpyrshang jong ka Mawlai, hynrei shwa ban wai um shym la lah ban khanglad ïa u Romarius, uba la ïoh ban thep ar kol na ka bynta ban pynlong ïa ka Mawlai ban jop shisyndon.
Ka jingïalehkai ha ka Lah Sngi U Blei kan long hapdeng ka Nangkiew Irat SC pyrshah ïa ka Ryntih FC ha ka por 3 baje nohphai sngi. Ka Nangkiew Irat ka la jop teng da 1-0 kol ha ka wat kaba nyngkong kaba la long ha u Nohprah mynshem snem.
