Shillong, Lber 02
Da ki hajar ngut ki nongmareh thong ki la poi ban ïashim bynta sha ka ïakob mareh ba la tip kum ka ‘Sarong La Ka Jong Run’, ba la pynlong da ka Seng Khasi Kmie ha ka Sngi Saitjaiñ kaba long kum shi bynta jong ka jingrakhe ïa ka lyngkhuh snem kaba 125 ka jingseng ïa ka Seng Khasi .
Ha kane ka jingïakob, ki nongwan ïashim bynta ba kynthup naduh ki samla kynthei bad shynrang lem bad ki nongmareh kiba la heh la san ka rta ki la wan ban ïashim bynta shit rhem bad ban pynphuh-pynphieng shisha ïa kane ka jingïakob. Lada kheiñ kyllum ki nongwan ïashim bynta baroh kiba la wan poi ki la kynjoh ïa ka 1300 ngut eiei.
Nalor katta, la nang pynphuh-pynphieng shuh shuh ïa kane ka jingïakob da ka jingwan ïashim bynta jong iwei i ‘riew kynthei bna nam ka Jylla ba la dep ïohpdiang na ka sorkar ïa ka khusnam Kiang Nangbah, i Kong Kmoiñ Wahlang.
Ïa kane jingïakob la pynlong ha ka 10km open, 10km na ka bynta 50 snem rta shaneng, 5 km Open bad 5 km na ka bynta ki paid Niam Khasi/Niamtre.
Ïa kane ka jingïakob la sdang na lympung Weiking Jaïaw, Shillong bad pynkut biang ha kane kajuh ka jaka. Nalor katta, ki nongpynïaid ki la sam ruh ïa ki khusnam kiba la lah ban pyndep ïa ka thong sha man la ki nongwan ïashim bynta, bad ha kajuh ka por la pynkup burom ruh ïa i Kong Kmoiñ Wahlang.
Ha kaba kut jong ka jingïakob ka la don ruh ka jingsam ïa ki khusnam sha baroh ki nongjop jong ka 10 KM Open kiba la ïoh khung ïa ka song pisa kaba long T. 8,000, 10KM ïa kiba 50 snem shaneng la ai ïa ka song pisa kaba T. 4,000, katba ki nongjop ha ka ïakob mareh 5km ka song pisa ka long mar T. 5,000.
Ïa kane jingïakob baroh kawei la pynbit pynbiang da ka ‘Program Committee 125 Years’ ka Seng Khasi Kmie.
Shwa ban sdang ka jingïakob mareh, la ïoh ïa ka jingkren ba la ai da u President ka Seng Khasi Kmie u Rgh O. Pyngrope, bad ha shwa ban sam ïa ki khusnam sha ki nongjop, la ïoh ïa ka jingkren na u Chairman ka Program Committee 125 Years u Rgh P.D Nongrum.
Ki nongjop ha ki jingïakob bapher-bapher ki long kumne harum:
Ïa ka nam nongjop ha ka 10km open category la rah da u Rishanmehi Ryngkhlem (37: 10 sec), ba-ar u Aiborlang Wanñiang (37:15) bad balai u Hasebinson Marweiñ (37:20), katba ha ka liang ki kynthei la rah da ka Lari Marbaniang (46:58), ba-ar ka Angelista Syiemlieh (47:18) bad balai ka Phyrnai Kyndait (47:20).
Ha ka 10km above 50 years la rah da u Bah Badon Sing Tham (44:10), ba-ar u Bah Swonding Mawlong (47:15) bad balai u Bah Jelin Sing Lyngdoh (47:47), katba ha ka liang ki kynthei la rah da ka Kong Menamary Wahlang (55:43), ba-ar Kong Rolinda Wanñiang (1:02:00) bad balai ka Kong Ihlingda Wanñiang (1:03:00).
Ha ka 5km open la rah da u Iwell John Ramsiej (16:36), ba-ar u Daioo Himitre Suting (17:24) bad balai u Jines Fulson Hoojon (17:30), ha ka liang ki kynthei la rah da ka Marqueenless Ramsiej (20:19), ba-ar ka Daplin Wahlang (20:50) bad balai ka Lyntijingkyrmen Kharjahrin (21:31).
Ha ka 5km Niam Khasi/Niamtre la rah da u Dabit Dkhar (16:47), ba-ar u Knerlang Phawa (16:50) bad balai u Dasaman Kyndait (16:55), ha ka liang ki kynthei la rah da ka Balasukdor Pathaw, ba-ar ka Ribika Dkhar bad balai ka Dakahi Kyndait.
