Shillong, Lber 03
U MLA ka Voice of the People Party (VPP) na North-Shillong, Bah Adelbert Nongrum ha ka sngi ba-ar jong ka Dorbar Mang Tyngka u la buh jingkylli ïa ka Sorkar Jylla la ka ‘Invest Meghalaya Authority’ (IMA) ka dei ne em ka mat treikam kaba kyrshan ïa kiba nabar bad kaba pyrshah pat ïa ki jong lajong.
U Bah Nongrum u la ong ïa kane haba wanrah ïa ka ‘Zero Hour’ hapoh ïingdorbar thawaiñ haba ïadei bad ka jingbym ai wai shuh jong ka MeECL ïa ka dewlynnong Lumpongdeng sha ka Maitshaphrang Tourism Promotion Group (MTPG).
“Naduh 1997, ka MeECL ka la ai wai ïa ka dewlynnong Lumpongdeng sha u Bah Michael Syiem jong ka MTPG. Suki-suki, da ka jingsdang jong ki kam ban kyntiew ïa ki kam jngoh pyrthei, ka dewlynnong kaba ha shuwa ka la sakhi ïa ka jingpynkhyllem pathar ïa ki dieng, mynta ngi la ïohi ïa ka jingpynthymmai ïa ka mariang ha ryngkat ka jingpynheh ïa ki khlaw bad wat ka jingwanphai biang jong ki mrad ki mreng,” ong u Bah Nongrum.
Haba kdew ba ïa ka dewlynnong Lumpongdeng, la ju bna ïa ka kum ka jaka jngoh kai pyrthei kaba pynbiang ïa ka jaka shong jahthait jong kiba bun kynthup ïa ki samla bad kiba rangbah kumjuh, u la ong ba ka MTPG ka la pynïeng ïa ka ‘Boathouse’ ha u snem 2008 – kaba nyngkong tam ha ka Jylla bad ka Thaiñ Shatei Lam Mihngi baroh kawei.
U la ïathuh ruh ba naduh u snem 1997, ki kam ban kyntiew ïa ki kam jngoh kai pyrthei ha dewlynnong Lumpongdeng ki la wanrah khajna sha ka Sorkar bad ai kam ai jam ruh ym tang sha ka longïing jong kito kiba peit bad shong ba sah ha katei ka jaka hynrei sha kiba bun kiwei-kiwei kiba sah ha ki sawdong-sawkun jong ka.
“Ka jingkylli kaba nga buh na bynta ka Sorkar ka long ban pyrkhat halor kane – ha kawei ka liang phi kyntait ban pynthymmai ïa ka jingaiwai jong ka jaka ka MeECL sha kynhun lajong kaba wanrah jingmyntoi shi kat dei sha ka Jylla, ha kawei pat ka liang, phi ai ïa kaba kum kane kajuh ka jaka jong ka MeECL ha Wah Umïam sha ki heh nongbei tyngka, kiba dei kiba nabar lyngba ka ‘Invest Meghalaya Policy’. Ïa kane ym lah ban ong ba ka dei ka ‘Policy’, hynrei ka jingïasylla,” la ong u MLA.
Haba kren shaphang ka ‘website’ jong ka ‘Invest Meghalaya’, u Bah Nongrum u la ong ba u la ïoh jingtip ba ka jaka kaba la tyrwa ha Wah Umïam ka long 300 akar bad ïa ka jaka la pyni kumba 4 plot kaba don hajan ka Wah Umïam (ha ka phang Mihngi) bad la kdew ba ka dei jong ka MeECL.
“Ha ‘website’ ïa kane ka jaka ha Umïam, la pyni kum ka jaka na bynta ban pynïeng ïa ka ‘Industrial Estate’ bathymmai kaba long kaba la khreh na bynta ka ‘notification’,” u la ong.
U la ong ruh ba kumba u Bah Michael Syiem u ïeng habar ka Secretariat bad ïakhih halor kane ka bynta, ma u kumjuh u ïeng hapoh ïingdorbar ban buh jingkylli ïa ka rukom treikam jong kane ka Sorkar – la ka ieh noh ïa ki nongseng kam jong lajong tang namarba ka kwah wanrah da ki nongbei tyngka ba-heh.
“Hato kane ka ‘Invest Meghalaya’ ka kyrshan ïa kiba nabar bad pyrshah ïa ki jong lajong…ki nongshong shnong ka Jylla ki kwah ïa ka jingpynshai halor kane,” la ong u Bah Nongrum.
Na ka liang u Myntri ka tnad bording, u A.T. Mondal haba jubab ïa kane ka bynta u la ong, “Ngi la shimkhia ïa kane ka kam. Ngi la ai lad ïa u nongshim wai kumjuh, bad ngi la ïakren sani bha bad u…ka jingthmu jong ngi kam dei ba ngi kwah ban khnieh noh, hynrei kaei kaba ngi leh, ngi ïaid katkum ka jingïateh kaba la don lypa katkum ka ‘Clause’ 7 jong ka jingïateh.”
Shuh shuh u la bynrap ba ïa kane ka mat la ïakren bad u nongshim wai bad ïa kane ka mat mynta la dep ban pynbeit.
