Shillong, Lber 03
Ki nongshong ïew kiba die jingdie ha Ïewduh bad Motphran ki la pynpaw ïa ka jingsngewkmen kaba khraw namar ba ka Voice of the People Party (VPP) ka la ïoh ïa ka bor ban synshar hapoh ka Khasi Hills Autonomous District Council (KHADC) hadien ba ka seng ka la ïoh jingjop ha 17 tylli ki konstitwensi ha ka ilekshon MDC kaba dang shu dep.
Haba ïakren bad U Nongsaiñ Hima ha ka 3 tarik u Lber, , ki nongshong ïew ki la pynpaw ïa ka jingsngewkmen bad ka jingkyrshan kaba radbah jong ki ïa ka VPP namarba ki kwah ïa ka jingkylla ba kan wan.
“Ngi sngewkmen palat ba kumba ngi la angnud ba ka jingkylla kan wan bad ngi sngewkmen ba ka VPP ka la synshar bad ba ka jingshngaiñ jong ngi ki Khasi kan don,” ong ki nongshong ïew.
Ki nongshong ïew ki la pynpaw ruh ka jingsngewngiah bad ka jingsngewthait ïa ka Sorkar kaba bat mynta ïa u lakam synshar bad pynpaw ruh ba ki don ka jingkyrmen sa tang ha ka VPP na ka bynta ka lawei ki khun-ki kti.
Ki nongshong ïew ki la pynpaw ruh ba kumba ki la ai ïa ka jingkyrshan kaba radbah ïa ka VPP, ki kyrmen skhem ba kane ka seng kan nym shet kylla ïa u paidbah bad ka jaidbynriew hynrei kan ïai trei hok na ka bynta ka bha-ka miat jong ki paidbah bad khamtam eh ban wanrah ïa ka synshar-ka khadar kaba khuid-ba suba ka bym don ïa ka jingleh shiliang khmat ïa uno-uno ne ka jingbamsap.
“Ngi kum ki paidbah ngi kwah ba ka VPP kan synshar hok bad leh hok na ka bynta ka Ri bad ka jaidbynriew. Sa kawei ruh ba ngi kum ki nongshong ïew, ngi kwah ba kin peit ïa ka jingwan buhai ki briew nabar kiba la bun palat kiba wan ban bylla ruh”, ong kitei ki nongshong ïew.
Haba kylli halor ka jingsngew jong ki ïa ka jingong jong u Chief Executive Member (CEM) bathymmai ka KHADC, u Bah Shemborlang Rynjah uba la buh ïa ka thong ban pynduna ïa ka jingai laisen khaïi lane ‘Trading license’ sha ki bar jylla bad kumjuh ban wanrah ïa ka aiñ thungkam-thungjam hapoh la Council, ki nongshong ïew kila pynpaw ka jingsngewkmen halor kane bad ki la khmih lynti ruh ba ki khun samla trai ri trai muluk kin ïoh shwa ma ki ïa ki kam-ki jam ym ban ïoh shwa da u bar jylla.
Haba kylli pat, kaei ka dawbah kaba la pynlong ïa ki paidbah ban kyntait noh war ïa ka Congress bad ban ai jingkyrshan ba radbah ïa ka VPP, ki nongshong ïew ki la pynpaw ba ka Congress ka la thok bad shukor ïa ki paidbah ka Jylla ha kaba kum ka seng ka khlem shym la lah ban pynurlong ïa la ki jingkular na ka bynta u paidbah.
