Shillong, Lber 03
U MLA ka Voice of the People Party (VPP) kaba don ha ka Liang Pyrshah na Nongkrem Konstitwensi, Bah Ardent M Basaiawmoit, u la pynpaw lypa ba kaei ka ban jia lada ka Sorkar Kmie ha kawei ka sngi kan bthah ïa ka Sorkar Jylla ba kan siew dep noh ïa ka ram ha ka dur jong u ‘Uranium’.
U Bah Ardent u la kren ïa kane haba ïashim bynta ha ka ‘Governor Address’ ne ka jingkren lamphang jong u Lat, ha ka Lah Sngi U Blei ka 3 tarik mynta u bnai hapoh ka ïingdorbar mang tyngka kaba dang ïaid shakhmat.
U Bah Ardent haba ïashim bynta u la ong, ba u la ïohi ka bynta ba ka Sorkar MDA ka don ïa kata ka jingkwah ne ka thong ban pynkylla ïa ka Jylla Meghalaya sha ka 10 Billion Dollar Economy ha u snem 2028. U la ong, “Hato kane ka Sorkar kan lah ban pynkylla 10 billion dollar shwa u 2028? Ngan dap da ka jingkmen ba lada ka jylla ka jong ngi kan kiew. Haba wanrah ïa ki mat, ngi kwah ruh ban ïohi ïa kaei ka jingïaid ha madan, ngim kwah ban shu kren ne don ka thong tang ha suiñ.” Une u nongïalam ka VPP u la ong ba ka Meghalaya ka long ka jylla kaba wan ba lai ha ka jingduk hadien ka Jharkhand bad Bihar kaba long katkum ka kaiphod jong ka National Multi Dimensional Poverty Index Baseline Report 2023. Ka Meghalaya ka la shah kynthup da 79.7 percent rate jong ka jingduk bad haba phai sha ka jingdon ki bym ïoh kam ïoh jam ruh ka percentage jong ka Meghalaya ka kham long halor ban ïa ka National Average.
U la ong, “Haba peit halor kine ki jingkheiñ kiba long artatien, hato ka Sorkar kan lah ban pynkylla ïa ka jylla Meghalaya sha kata ka 10 billion dollar? Nangno ka pisa kan wan, ngin dang lah ban bteng ka shim ram na ki bank bad ngi ïohi ba ki don bun jait ki ram ba la shim da ka Sorkar na ki bank bapher bapher bad kumjuh na ka Sorkar Kmie.”
“Ka Sorkar Jylla ka dang bteng ban shim ram. Nga sngew ba nga kum u dkhot ka ïingdorbar nga don ka hok bad ruh ki paidbah ki dei ban tip, haduh katno ka ram ka Meghalaya ka la dep shim ha u snem mang tyngka 2024-2025, haduh katno ba hap ban siew da ka Sorkar Meghalaya, bad ka ram kaba kumno,” la ong u Bah Ardent bad u la bynrap “Nga kwah ban pynkynmaw ïa ka ïing, ka Meghalaya ka dei ka jylla ka bym don jingmih satia, ha kaba wat u Myntri Rangbah ka jylla ruh u la dep ban kubur ha kawei na ki jingïalang, ba ka Sorkar Jylla ka shaniah tylli ha ka Sorkar Kmie.”
Shuh shuh, u Bah Ardent u la ong, “Ka jingkylli sha ka Sorkar Jylla, hato ngi la long kiba la khreh ban siew ïa ka ram? Lada ym lah, hato ka Sorkar Kmie kan pyllait ïa ngi, bad ngi la long kiba la khreh halor ki kyndon ban buh da ka Sorkar Kmie ban pyllait ïa ngi? Lada ka Sorkar Jylla ka dang bteng ban shim ram, nga sngew ba ha kawei ka sngi, ngi hap ban kynduh ïa ki kyndon, kaei ka ban jia ha kawei ka sngi lada ka Sorkar Kmie kan bthah ïa ka Sorkar Jylla ban siew ïa ka ram ha ka dur jong ka jingailad ban khlong ïa u ‘uranium’.” “Ngi la ïohi katkum ki khubor ha ki lad pathai khubor, ka Sorkar Kmie ka la buh ka por ïa ka Sorkar Jylla ba ka dei ban pyndep ïa ki projek ba bun, lada kam lah dei ban pynphai noh baroh ka pisa. Hynrei haba nga sngap bad nga ïohi ba ki dkhot ka ïingdorbar ki ïaroh ïa ka Sorkar halor ki projek pyntreikam kiba bun, hynrei dei ban tip ba baroh ki skhim ba ïakren ki dei ki skhim na ka Sorkar Kmie, ngi kum ka jylla ngi dei tang ki nongpyntreikam, kum ka skhim JJM, ka Housing bad kiwei kiba bun, kumta lada kwah ban ïaroh, ka Sorkar Jylla ka dei ban sdang ïa ki skhim lajong bad hangta ngin sa ïaroh,” la ong u Bah Ardent.
