Shillong, Lber 03
U President ka Meghalaya Muaythai Association (MMA), Bah Anjelius Sun, u la pynpaw ïa ka jingkyrmen kaba skhem ba ka kynhun ïalehkai Muay-thai ka Jylla kan khur ym duna ïa 10 tylli ki takma lada kane ka jingïalehkai kan ïoh rung ban ïashim bynta ha ka 39th National Games ka ban long ha u snem 2027 ha ka jylla Meghalaya.
Haba pynpaw sha ki lad pathai khubor ha ka Lah Sngi U Blei ha Shillong Press Club ha ka por ba pynbna ïa ka kynhun ïalehkai ka Jylla ban mihkhmat ïa ka ri India sha ka “IFMA Senior Men’s & Women’s World Muaythai Championship Elite & U-23” ka ban sdang naduh 22 tarik u Jymmang haduh ka 1 tarik u Jylliew 2025 ha Kemer Antalya kaba ha Turkey, u Bah Sun u la pynpaw ka jingai khublei halor ka jingshim khia ka Sorkar Jylla lyngba ka tnat ïalehkai da kaba sam ïa ki khusnam kyrpang sha baroh ki nongïalehkai kiba la ïoh jingjop ha ki lympung ïalehkai bapher bapher kiba la long shabar Jylla ha u snem ba la dep (2024) bad kaba la pynbna ruh ban ai da ka kam sorkar sha ki nongïalehkai ki ban khur takma ha ka National Games, Asian Games bad ha ka Olympics.
Kane ka jingïalehkai Muaythai mynta ka dang dei ka jingïalehkai ka bym pat ïoh ka jingithuh na ka Indian Olympic Association (IOA) bad dei na kane ka daw ba kam pat shym la ïoh ïashim bynta ha ka National Games. “Ka MMA ka la ïoh jingithuh na ka International Federation of Muaythai Associations (IFMA), hynrei ïa mynta ngim pat ïoh jingithuh sa na ka IOA bad shen ngi khmih lynti ba ngin sa ïoh ka jingithuh,” la bynrap u Bah Sun da ka jingkhmih lynti ba ka jingïalehkai Muaythai ka la ïoh rung haba ka Jylla kan pynlong ïa ka National Games ha u 2027.
“Lada ka urlong shisha ba ka Muaythai kan ïoh rung sha ka National Games, kum u nongïalam jong ka synjuk ngan da duhthiah duhdem na ka bynta ban trei shitom khnang ban pynbit pynbiang ïa ka kynhun bad nga kular ruh ban sei ïa ki khynnah ïalehkai kiba kynsai ym duna ïa 10 ngut ki ban khur takma ïa ka Jylla.
