Shillong, Lber 03
Ka Shillong Lajong ka la wanphai da ka jingjop ha ka lympung ïalehkai I-League, hadien ba ka la lah ban pynliem noh ïa ka Gokulam Kerala da 4-3 kol ha ka Lah Sngi U Blei ha EMS Stadium, kaba ha Kozhikode, Kerala.
Kane ka la wan urlong lyngba u rangïalehkai shakhmat na Brazil u Renan Paulino (90+6) uba la lah ban thep khatduh shwa ban wai ka jingïalehkai na ka bynta ban pynlong ïa ka Lajong ban jam sha ka kyrdan basaw.
Wat la ka SLFC ka la shah rem da 2-0 kol ha ka SC Bengaluru ha ka jingïalehkai ba la dep, pynban ha kane ka jingïakhun ka la lah ban pynpaw ïa ka jingtbit.
Tang mar ïasdang ka jingïaleh -kai ka Gokulam ka la pynkhih jar nyngkong eh ha ka minit kaba 9 lyngba u Thabiso Brown, hynrei tang hadien san minit ka SLFC ka la lah ban pynphai kylla lyngba u Phrangki Buam.
Hadien san minit ba la bteng biang ïa ka jingïakhun jong ka kylla miet, u Buam u la thep biang ïa ka kol ba ar ha shwa ba u Brown (54) un pynïakhaid biang ïa ka Gokulam. Ka Lajong ka la thep biang ïa ka kol ba lai lyngba u Marcos Rudwere Genar Silva ha ka minit kaba 85, hynrei ka Gokulam ka la pynïakhaid kylla lyngba u Mashoor Shereef (88).
Kumta shwa ban wai ka jingïakhun ka Lajong ka lah ban pynurlong ïa ka jingjop hadien ba u Renan Paulino u la ïoh ban thep ha ka minit kaba 90+6.
Lyngba kane ka nam jop ka SLFC kaba la don ha ka kyrdan basaw ka la ïoh 26 poiñ bad duna sa 5 poiñ ïa ka Churchill Brothers kaba dang lamkhmat ha kane ka lympung, katba ka Gokulam ka la hiar sha ka kyrdan ba hynriew ryngkat 25 poiñ na 16 sien ïakhun.
Ka Lajong kan leit sha Goa na ka bynta ban pynkhreh ïa ka jingïakhun shabar na la ïing pyrshah ïa ka Churchill Brothers ha ka Sngi Thohdieng (7 tarik).
