Shillong, Lber 03
U MLA ka TMC na Dadenggre, Rupa M. Marak ha ka Lah Sngi U Blei u la ban jur ban pynkhlaiñ ïa ka Megha-laya Residents Safety & Security Act (MRSSA) na bynta ban peitngor ïa ka jingwan rung kyrthep jong ki briew na kiwei pat ki Jylla.
“Kine ki briew na kiwei pat ki Jylla ki wan sha ka Jylla jong ngi bad ki la dep kurup lypa ïa ka ‘Tertiary Sector’ (jong ka Jylla) kaba ai jingshakri ïa ki briew hapoh ka Jylla,” ong u Marak haba ïashim bynta ha ka jingïatai halor ka jingkren u Lat ka Jylla.
Haba kdew ba kane ka long kumba knieh noh ïa ki hok ïoh kam ïoh jam jong ki nongshong shnong ka Jylla, u MLA u la ong ba ka dei ban don ka mat treikam ka ban peitngor halor ka jingwan rung kyrthep jong kito kiba wan na kiwei pat ki Jylla.
“Ïa ka ILP la dep ban dawa da kiba bun ki kynhun seng, kumjuh ha ka por ba nga dang don ha ka kynhun seng, ngi la dawa ruh na bynta ka jingpyntreikam ïa ka ILP hynrei kane ka dei ka sobjek jong ka Sorkar Pdeng,” u la ong.
Haba pynsngew ba ka Sorkar ka la mynjur ïa ka rai haba ïadei bad ka jingpyntreikam ïa ka ILP hapoh ka Jylla, ha kawei ka liang u la ban jur ba dei ban pynkhlaiñ ïa ka MRSSA khnang ban peitngor ïa ka jingwan rung kyrthep jong kiba nabar Jylla.
U Marak haba pynpaw ba u Lat um shym la kdew eiei halor ka jingwan rung be-aiñ sha ka Jylla na shiliang Bangladesh, u la ong ba kane ka dei ka jingma kaba khraw ym tang ïa ka Jylla hynrei ka buh jingma ïa ka jingshngaiñ jong ka ri baroh kawei.
“Ha ka 28 tarik Rymphang, kumba 6 ngut ki nong Bangladesh ki la shah bat ha ki pulit ha Jengjal Police Outpost kaba hap hapoh konstwensi jong nga. Kane long kaba ma bha ba kum kine ki kam ki wan jia. Ïa kine ki nong Bangladesh, la ïarap da ki nong India jong ngi hi,” u la ong.
Kumta u la ong ba ka dei ban don ka mat treikam ban peitngor kham bha ïa ki khappud jong ka Jylla namar kumba ka long mynta, ka Bangladesh kam don hapdeng ka jinglong-jingman kaba itynnad.
“Ki briew na shiliang Bangladesh ki pyrshang ban wan rung shapoh jaka jong ngi nalor ba ngi ïasam ïa u pud uba jrong bad ka Bangladesh,” u la ong.
Halor ka jingshah ktah ka jingrep kwai ha Ri-lum Garo, u Marak u la ong ba dei ban don ka mat treikam ka ban tehlakam ïa ka jingnang pur jong ka khlam jingpang lym kumta ki nongrep kin mad jingeh shi kat dei.
“Hooid, ka don ka mat treikam ban ïada ïa ki jingthung, te hap ban pynkhlaiñ ïa kane khnang ba ki nongrep kin ïoh jingïarap na ka Sorkar,” u la ong.
Shuh shuh haba kdew ba u Lat um shym la kren halor ka jingrem ka bai sumar khamtam na bynta ki ‘riew paidbah, u la ong ba ki nongkyndong haba ki wan sha ki jaka sumar Sokar ban phah sumar, la phah leit pynban ïa ki sha ki jaka sumar shimet na bynta ka jingsumar kaba kham bha – kaba ktah pat ïa kiba duna ka ïoh ka kot naba kim kot bor ban siew namar ka jingrem dor ka bai sumar.
“Ha ki jaka sumar Sorkar, kito ki bym don kyrdan ha ka imlang-sahlang, ki shah kyntait, kumta dei ban khmih bniah ïa kane,” u la ong.
U MLA u la kyntu ruh ïa ka Sorkar ban pynbiang ïa ki lad jingïarap ba mardor sha kito ki lanot kiba ngat ha ki jinglynshop mariang.
Nalor kane, haba phai sha ka tnad pule-puthi, u Marak u la ong ba ka tnad ka dang duna bha khamtam ha ka liang ki jingdon-jingem bad ai jingmut ban pynbun ïa ki prokram ai jinghikai sha ki nonghikai bad ka jingsiew tulop biang por kum shi bynta ban nang kyntiew shuh-shuh ïa ka tnad khnang ban ïoh ïa ka pule-puthi kaba paka.
