Shillong, Lber 03
Ka Meghalaya Football Association (MFA) ka dang ïaid shakhmat ka jingpynkhreh ïa ka JN Stadium bad ka jaka kilanmet jong ka NEHU na ka bynta ar tylli ki jingïaleh-kai bar ri (International) ki ban pynlong mynta u bnai ha kane ka nongbah.
Kane ka long ka sien kaba nyngkong eh ba ka nongbah Shillong kan pynlong ïa ki ar tylli jingïalehkai bar ri jong ki shynrang ha kaba nyngkong ka dei ka jingïalehkai paralok hapdeng ka India bad ka Maldives ha ka 19 tarik bad ba ar ka dei ka AFC Asian Cup 2027 qualifier hapdeng ka India bad ka Bangladesh ha ka 25 tarik mynta u bnai.
Wat la dangshen ki la mih ki khubor halor ka jingartatien ka Maldives ban wan ïalehkai sha kane nongbah, hynrei ha ka jingïakren bad ki lad pathai khubor ha ka Lah Sngi U Blei u General Secretary ka MFA u Bah Sunesh Syiem bad u Vice President ka MFA u Bah Cliff Nongrum ki la pynshai ba ka jingïalehkai kan long beit ha kane ka nongbah kumba la dep ban pynbna kham hashwa.
“Nga la sngew lyngng -oh ban ïohi ïa kata ka khubor namar na ka AIFF (All India Football Federation) kam shym la don kano-kano ka jingpyntip ïa kata,” la ong u Bah Syiem. “Tang mynta ka sngi ka AIFF ka la buh ruh ïa u Match Commis-sioner na ka bynta katei ka jingïalehkai paralok. La kyrpad ba ka Maldives kan poi ha Shillong ar sngi shwa ka tarik ba la buh bad ngin pynbiang na ka bynta jong ki.”
Dangshen, ka JN Sta-dium ka la dep ban ïoh ïa ka jingïaroh kaba khraw na u AFC Match Commis-sioner u Mindu Dorjee bad u Asst. Coach jong ka India u Mahesh Gawali, ha kaba u la batai ïa katei ka madan kum “kawei na ki madan ïalehkai phutbol ba bha tam” ha ka ri. Ka madan kilanmet kaba don ha phyllaw jong ka skulbah NEHU ka donkam shisha katto-katne ka jingtrei khnang ba kan long kaba biang bad ka donkam ban pynmadan ïa ka, la ong u Bah Nongrum.
Kine ar tylli ki jingïalehkai bar ri ka la wan hadien ka jingseisoh ka Jylla ban pynlong ïa ka Durand Cup, nangta mynta u snem la ïoh ban pynlong ïa ki jingïalehkai Indian Super League. Ha kine ki khyndiat snem ba la dep ka sorkar jylla ka la shim ïa ka rai ban pynkylla dur noh ïa ka JN Stadium da kaba bujli noh da u phlang ba shisha ha ka jaka u phlang plastik namar ka jingthmu hi ka long ban wanrah ïa ki lympung ïalehkai kiba heh. Te kumta ïa kane la lah ban pynurlong lyngba ka jingmih ki ïingbasa kiba heh (five-star hotels) bad kiwei kiwei ki jingtei ruh ki la don bynta ban khring ïa kine ki jingïalehkai sha Shillong.
Haba batai khyndiat kumno la jied ïa ka Meghalaya na ka bynta ka jingïalehkai jong ka Maldives bad Bangladesh, u Bah Syiem u la ong ba ka AIFF ka la ïohi haduh katno ka jingjop ka nongbah Shillong ban pynlong ïa ka Durand Cup, ka jingsngewtynnad jong ki nongkyrshan bad ki la tyrwa ïa ka MFA ban pynlong ïa kitei ki ar tylli ki jingïalehkai. “Nangta ngi la leit sha ka sorkar jylla bad ngi sngewnguh shibun eh ïa u Myntri Rangbah ka Jylla jong ngi uba la kloi ban kyrshan ïa ngi ban wanrah ïa kine ki jingïalehkai,” u la bynrap.
Ka MFA ka ïohi ïa kine ki jingïalehkai international kum ka lad ban nangai mynsiem shuh shuh ïa ki samla ïalehkai ka jylla. “Ka kynhun jong ka India kan wan sah lypa ha kane ka nongbah haduh artaiew bad ngi kyrmen ban pynbeit ïa ka jingïakren hapdeng ki nongïalehkai bad ki khynnah shynrang bad kynthei na ki shlem ai jinghikai ha kane ka por,” la bynrap u Bah Syiem.
