Shillong, Lber 03
Ki synjuk ïalehkai phutbol ha ka Jylla ki la pynpaw ka jingsngewsih halor ka jingduh noh ïa u nongïalam (L) Bah S.S Rapthap, uba la khlad noh ha ka janmiet jong ka Sngi Saitjaiñ.
U Bah Rapthap (Bah Heprit) uba dei u General Secretary barim ka Shillong Sports Association bad ka Meghalaya Football Association, u la bat kum u Vice-President ka SSA tad haduh ba un da khlad noh.
Une u rangbah ba la 68 snem ka rta, u la shakri ruh ïa ka Mawkhar Sports Club bad dang shen u la bat kum u Adviser jong kane ka klob.
Ha ka khubor sngewlem sha ki bahaïing-bahasem, u General Secretary ka MFA, Bah Sunesh Syiem u la ong ba ka synjuk ka dap da ka jingsngewsih halor ka jingkhlad noh jong u Bah Rapthap. “Ka dohnud jong ngi ka leit sha ka longïing-longsem jong u ha kum kane ka por kaba ki mad ïa ka jingsngewsih.”
U la bynrap, “Ngin ïai kynmaw ïa u Bah Heprit kum u briew uba jar-jar, ka jingsbun bad ka jingphuh samrkhie. Ngin ïai kynmaw ruh ïa u na ka bynta ki kam jong u ha kine ki snem ba la leit, na ka bynta ka jingroi bad jingkiew jong ka phutbol ha Shillong bad ha ka Jylla hi baroh kawei.”
Ha kawei pat ka liang, ka SSA ka la pynlong ïa ka jingïalang sngewlem na ka bynta u Bah Rapthap ha ka Lah Sngi U Blei, ha kaba la ïadon lang ki ‘riew rangbah bad la pynïaid ïa ka jingïalang da u President Bah Banteidor Lyngdoh (MLA).
La pynlong ruh ïa ka jingsngap jar kaba shi minit shwa ban sdang ïa ka jingïalehkai jong ka Shillong Premier League hynne ka sngi bad ka SSA ka la rai ban pynkynriah noh ïa ka jingïalehkai kaba la buh ban long ha ka Sngi Ba-ar sha ka tarik kaba kham shadien kum ka dak ka jingburom bad ban ailad ïa ki nongïalehkai, ki nongïalam jong ki klob, ki coach bad kiwei kiwei ban leit sngewlem ha ka jingleh burom khatduh ha ka por 12 baje mynsngi.
