Shillong, Lber 03
Ka Drug Reduction Elimination & Action Mission (DREAM) kaba dei ka prokram jong ka Sorkar Jylla ban ïakhun pyrshah ïa ka jingdih drok bad jingkhaïi ha ka Jylla, ha ka 3 tarik u Lber, 2025, ka la pynlong ïa ka jingïalang hapdeng ki kmie ki kpa jong ki khynnah kiba la ngop ha ka kyrni ban dih ïa u drok ban ïathir-ïatai ha kaba ïadei bad ka jingeh kaba ki mad ha ïing-ha sem, ban ai ïa ka jingïasyllok, ka jingkyrshan, ka jingsngewlem bad khamtam eh ban ïakren ïa ka jingeh kaba khraw tam kaba ki ïakynduh ha ka imlang-sahlang ha ka jingmad jong ki ïa ka jingshah ibein ne ka jingshah peit beiñ ha kiwei pat namar ka jingngop jong ki khun jong ki ha une u jait jingdih pynbuaid.
Ïa katei ka jingïalang la pynlong ha ka kamra jingïalang jong ka ophis Social Welfare kaba don ha Lachumiere, Shillong.
Haba kren sha ki lad pathai khubor, u Bah Francis Kharshiing uba dei Mission Director ka DREAM, u la ong ba kane ka dei ka sienjam kaba nyngkong ba na ka liang ka Sorkar ka kwah ban ai ïa ka jingkyrshan sha kitei ki longïing-longsem ha kano-kano ka rukom khamtam eh ha kaba ïadei bad ka jingdonkam ban pynduh-pyndam noh ïa ka jingshah peit ibeiñ khmat ha kiwei pat.
“Kaba kongsan ka dei ban pynkhlaiñ ïa ka jingmut-jingpyrkhat namar kane kam dei ka jingpang-jingshitom kaba long kum kiwei ki jingpang hynrei kane ka jingkyrni ka dei ka jingpang ha ka jingdih ïa u drok bad ka ktah ym tang ïa u ne ka khynnah hynrei ka ktah ïa ka longïing-longsem baroh”, ong u Bah Francis.
U Bah Francis u la ïathuh ba ki don haduh kumba 15-20 ngut ki kmie-ki kpa jong ki khynnah kiba la wan ban ïashimbynta ha katei ka jingïalang na kylleng ki jaka bad ki distrik jong ka Jylla.
U la ong ba ha katei ka jingïalang nalor ki kmie- ki kpa jong ki khynnah, la ïadon bynta lang ruh da ka Dr. Rica Lamare kaba dei ka Counsellor jong ka Manbha Foundation kaba la ai jingkren halor kumno ban pynkhlaiñ ïa ka jingmut-jingpyrkhat jong ki kmie-ki kpa ki khynnah.
U la pynpaw ruh ka jingkmen kaba khraw halor ka jingdon jong ki kynhun kiba la mih shakhmat ban pynpaw ïa ka jinglong kloi jong ki ban seng sa 5 tylli ki ‘Rehabilitation Centre’ ne ki jaka ban ai jingsumar na ka bynta kito kiba la ngop ha ka jingkyrni ban dih ïa u drok.
Shuh-shuh, u la ong ruh ba na ka liang ka Sorkar kan ai T.32 hajar kum ka lad jingïarap sha ki longïing-longsem jong ki khynnah kiba wan na ki longïing-longsem kiba duk ne kiba hap hapoh u laiñ jong ka jingduk ne BPL ba kin leit ban phah sumar ha ki ‘Rehabilitation Centre’.
“Naka liang ka Sorkar ka la don lypa ïa ka skhim ha kaba ka ai jingïarap kaba T.32 hajar ïa uno-uno u khynnah uba wan na ka longïing BPL bad ïa ki ‘Rehab Centre’ ruh ngi ai jingkyrshan”, ong u Bah Kharshiïng.
