Imphal, Lber:
Ha ka jingkhynra kaba jur, ki pulit ka jylla Manipur ki la kem ïa arngut ki dhot jong ka sengbhalang Kangleipak Communist Party (People’s War Group) [KCP (PWG)] na ki jaka lum jong ka Ngariyan Hill hajan Camphor Sungpham, Andro, kaba hap hapoh ka Irilbung Police Station ha Imphal-East District.
Kine ki briew kiba la shah kem ki dei kiba la tip kyrteng kum u Yumnam Abung Singh uba la sin kyrteng u Chingakpa (39) bad u Thangjam Joykumar Singh (52). Katkum ka khubor na ki pulit, ki la don bynta shitrhem ha kaba kit ïa ki tiar ïaleh bad ki tiar siat, kumjuh ruh ha ki kam shim pisa kiba thmu ïa ki paidbah, ki kompeni shimet, bad ki heh sorkar.
Ki bor pahara ki la ïoh ban kurup ïa kine ki tiar harum na ka kti jong ki ar tylli ki suloi 9mm kiba don ar tylli ki Magazine, ar tylli ki bom kawang kti ba la shna da China, shi tylli ki kuli 9mm, shi tylli ki kuli INSAS 5.56mm, kawei ka Rifle Magazine INSAS bad kawei ka Sling Bag.
Ha ka jingkhynra ba kyrpang, ki pulit ka Manipur ki la ïoh ban kem ïa arngut ki briew na Upper Kathikho Karong hajan ka jaka bret ñiut jong ka KSTC harud ka NH-2 kaba hap hapoh Senapati Police Station ha Senapati distrik. Kitei kiba la shah kynnoh ki dei kiba la tip kyrteng kum u Bishwajit Hazarika (46) bad u Irfan Hague (34).
La ïoh kurup na ki haduh 20 tylli ki sabon kiba la suba ba ki don ïa u Brown Sugar kiba khia 828 gram (kynthup ïa ka jingsong), ryngkat bad kawei ka kali saw shaka.
Ïa ki briew kiba la shah kem bad ki tiar kiba la shah kurup la aiti noh sha ki thanat jong ki pulit na ka bynta ban leh ïa kaba donkam katkum ka aiñ.
