Nongpoh, Lber 04
Ki bor ba dei khmih jong ka tnat Excise ka Ri Bhoi District ha ryngkat ka jingïatreilang bad ki pulit ka thanat Umïam bad ruh ki bor ka tnat Excise ka jylla Assam, ha ka Sngi U Blei ba la dep, ki la ïoh ban kurup ïa bun ki tiar ki tar kiba ïadei bad ka kam shna beaiñ ïa ka kyiad phareng ha ka jingkhynra kaba la pynlong ha Umïam EPIP bad ha lad Umroi, marjan bad ka surok Umïam Bypass.
Kum ban shu kdew, kane ka jingkhynra ka dei hadien ba ki bor ba dei khmih ka tnat Excise ka Kamrup Metro na ka jylla Assam, nyngkong ki la ïoh ban bat ïa kawei ka trok kaba don ïa u registration number AS11-AC-9144 ha Khanapara bad ïoh ban kurup haduh 10 hajar tylli ki jingtah kyrteng (label) thok jong ka kompeni ‘Mc Dowell’s No. 1 Luxury Whisky’. Ha ka jingtohkit ïa u nongñiah jong katei ka trok la ïoh jingtip ba ka la don ka jaka shna beaiñ ïa ka kyiad phareng (Indian Made Foreign Liquor) IMFL ha Umïam, Ri Bhoi District.
Haba kren sha ki lad pathai khubor, u Superintendent of Excise ka Ri Bhoi District, Bah RC Lyngdoh u la ïathuh ba ha ka Sngi U Blei ha ka por kumba 2 duna eiei shiteng sngi, la ïoh ka jingbthah na u Commissioner of Excise, Shillong ba ka la don ka jingpyntip na ka tnat Excise ka jylla Assam ba ki kwah ban pynlong ïa ka jingkhynra lang (joint operation) bad kumta hi na ka liang ka tnat Excise ka District ruh ka la phah mar mar ïa la ki ophisar ban pynlong ïa ka jingkhynra ha ki ar tylli ki jaka kiba la suba don bynta ban shna beaiñ ïa ka kyiad IMFL khlem ka jingïoh jingbit na ki bor ba dei khmih ka Sorkar.
U Bah Lyngdoh u la ïathuh ba ha katei ka jingkhynra kaba la pynlong da ka tnat Excise ka district bad jylla Assam ryngkat bad ki pulit ka Umïam ha EPIP, ym shym la lap eiei satia, bad ha ka jingkhynra kaba la pynlong pat hajan lad Umroi jong ka Shillong Bypass la ïoh ban kurup ïa bun ki tiar kiba ïadei bad katei ka kam beaiñ ban shna thok ïa ka kyiad IMFL kiba kynthup naduh ki Holograms jong ka tnat Excise ka jylla Meghalaya bad Assam, blending bad Storage tanks, capping machine, production line, flavouring & colouring agents, bilor thylli, ki kot jingtah thok (fake labels), ki synduk thep kyiad (Cartoons), jingtap bilor bad ruh ki bilor kyiad (finished goods) kiba thmu ban pynïaid ïew kiba don haduh 23 hajar tylli kiba kynthup ïa ka kyiad Royal Stag, Mc Dowell’s No. 1 Luxury Whisky bad ka Officer’s Choice Blue.
Shuh shuh, u Bah Lyngdoh u la ïathuh ba na ka liang ka tnat ka dang ïaid shakhmat ban pynlong ïa ka jingtohkit halor kane ka kam beaiñ bad ban lap ïa ki briew kiba donkti bad ujor pyrshah ïa ki sha ka ïingbishar. Nangta u la pyntip ruh ba ïa ki tiar ki tar baroh kiba la ïoh kurup na katei ka jaka, yn rah noh sha kawei pat ka jaka kaba kham shngaiñ.
