Shillong, Lber 04
U Virat Kohli u la lah ban kynjoh ïa u mawmer ha ka kam ïalehkai jong u ha ka jingïakhun semi final jong ka Champions Trophy 2025 hapdeng ka India bad ka Australia kaba la long ha ka Sngi Ba-ar.
Kane ka jinglah jong u Kohli ka la wan ban urlong hadien ba u la kem ïa ka bol ba la tied da u Josh Inglis ha ka over kaba 27 bad ka long kaba kongsan ha ka kam ïalehkai jong u.
Utei u nongtied bad ap wiket ka Australia u la pyrshang ban ïalehkai hadien ba u la ïoh ban khyrwit ïa ka bol ba la kawang da u Ravindra Jadeja, hynrei u Kohli u la ïoh ban kem suk ïa ka bol bad ban pynlong ïa ka India ban ïoh ïa ka wiket kaba saw.
Kane ka jingkem ka la long kaba kham kyrpang namar ka la pynlah ïa u Kohli ban tam ïa ka rekod jong u Rahul Dravid uba la ïoh 334 tylli ki jingkem ha ki jingïalehkai bar ri jong ka India ha baroh ki lympung ïalehkai. U Kohli u la pyndep ïa kane ka jingjop ha ka jingïalehkai kaba 549 sien ha ki jingïalehkai bar ri.
Kumba ka paw ïa ka kyrdan ba nyngkong ha ka pyrthei la bat da u Mahela Jayawardene (440), Ricky Ponting (364), Ross Taylor (351), Jacques Kallis (338), Virat Kohli (336) bad u Rahul Dravid (334).
U Kohli u la tam ruh ïa ka rekod jong u Ricky Ponting ha kaba u la ïoh kem bun tylli kum u nongap bol (fielder) ha ka One Day International. U Kohli, 36 snem ka rta, u la pyni ïa la ka sap ïalehkai da kaba u la ïoh ba ban kem ar tylli katba ka Australia ka la shah pynhap baroh ki nongtied bad ïoh 264 ron.
Da ka jingïoh ban kem 161 ha 301 tylli ki jingïalehkai, u Kohli mynta u bat ïa ka kyrdan ba ar ha ka thup jong ki nongap bol (fielder) ba la ïoh ban kem bun eh ha ka ODI, hadien ïa u nongïalehkai ka Sri Lanka u Mahela Jayawardene kaba la ïoh 218 sien.
Ïa ka kyrdan ba nyngkong napdeng ki nongap bol (fielder) ha ka ODI la bat da u Mahela Jayawardene (218), ba-ar u Virat Kohli (161) bud pat da u Ricky Ponting (160), Mohammad Azharuddin (156) bad u Ross Taylor (142).
