Shillong, Lber 05
Ka Nongthymmai SCC ka la lah ban pynliem noh da 5 wiket ïa ka Malki CC ha ka jingïalehkai jong ka lympung Shillong Cricket League First Division 2024-25 kaba la long ha ka Sngi Balang ha madan Polo, Shillong.
Haba phai sha ka jingïalehkai ka Malki CC kaba la jop kynting pisa ka la rai ban tied nyngkong ha kaba ka la lah ban ïoh 214 run haduh kaba kut jong ka 40 over bad khyllem 7 wiket. U Sylvester Mylliempdah u la lah ban lehkai bha na ka Malki da kaba tied 74 run na 97 bol, katba u Junjun M Sangma u la kyrshan lang da kaba ïoh 58 ron na 49 bol.
Katba na ka liang ki rangkawang bol jong ka Nongthymmai kiba la lah ban lehkai bha ki long u Gaurav Narleng uba la shim 3 wiket/34 run na 5 over bad u Aashish K Lohar uba la shim 1 wiket /21 run na 4 over.
Haba wanphai sha ka pali ban tied ka Nongthymmai SCC ka la lah ban kynjoh ïa ka thong da kaba pynsah sa 5 wicket ban jop ïa ka Malki ha kane ka jingïalehkai, kata da kaba ïoh 217 run /5 wikets na 35.4 over.
Wat la na ka liang ki rangïalehkai jong ka Malki kiba kynthup ïa u Aiborlang Wahlang uba la shim 2 wiket/42 run na 5.4 over bad u Heimon Lyngdoh uba la shim 1 wiket/37 run na 8 over, hynrei kim shym la lah pat ban khanglad ïa ki rangïalehkai ka Nongthymmai kiba don ha ka liang pyrshah ban poi sha ka thong.
U Sagar Chetri rangïalehkai ka Nongthymmai u la long uba kongsan tam ha ka liang ban tied namar u la ïoh ïa ka spah run (100 run na 68 bol), kaba la pynlong ba un ïohpdiang ruh ïa ka khusnam Player of The Match. Katba na ka liang jong u Aashish K Lohar u la ïarap ïa ka kynhun da kaba ïoh 38 run na 52 bol.
