Shillong, Lber 05
U Myntri Rangbah ka Jylla, Conrad K Sangma u la ong ba ka jingkren ba ka Sorkar India kan pan tih da u ‘Uranium’ lada ym lah siew ïa ka ram, ka dei ka jingkren mutdur bad pynkulmar ïa ki paidbah.
U MLA ka Liang Pyrshah jong ka Voice of the People Party (VPP) na Nongkrem Konstitwensi, Bah Ardent M Basaïawmoit, haba kren halor ka jingmait phang u Lat lane ‘Governor Address’ hapoh Ïingdorbar ha ka sngi Nyngkong ka 3 tarik mynta u Lber u la ong, kaei ka ban jia lada ka Sorkar Kmie ha kawei ka sngi kan bthah ïa ka Sorkar Jylla ba kan siew dep noh ïa ka ram ha ka dur jong u ‘Uranium’.
U Myntri Rangbah u la ong ba ka jingshim ram ka long beit katkum ka kyndon jong ka aiñ bad lada ka Sorkar kwah ban shim ram ruh kam lah ban leh kumta lada kam dei katkum ki kyndon.
“Kum kane ka rukom kren rukom mutdur ba kan jia bad pynkulmar ïa ki paidbah kam dei ka lynti kaba dei. Ka Sorkar India ka la buh thik-pa-thik ki kyndon bad ka Sorkar Jylla ruh ka bud pyrkhing bha ïa kita ki kyndon. Kumta, ka jingkylli ïa ngi ban poi haduh uta u pud kan ym mih, wat lada mutdur haduh u pud ba kham shyrkhei shuh-shuh ruh kane kan ym jia”, la ong u Conrad haba jubab sha ki lad pathai khubor ha ka Sngi Balang.
U la ong ban shu shim nuksa na ki ri kum ka Ukraine, USA bad wan buh hangne, bad ong ba kum kita ka Sorkar hangne ruh kan leh, ka long kaba bakla ka rukom pyrkhat.
“Lada ki sngew ba ki don jingthut ha kaba ïadei bad ka ram ngin pynshai, ngi la pynshai da ki spah sien ngin pynshai biang sha ki, bad kumba ngi la batai sha baroh kumno ngi siew bad balei ngi shim shuh shuh ngin batai pynshai biang ïa ki”, la ong u Conrad.
U Myntri Rangbah u la ong ba ka ram kaba shim ka Sorkar Jylla, haduh 90 percent ki dei ba siew ka Sorkar India, ha kaba u la ong ba kam don eiei ka jingeh na ka ram lane na ka jingshah ram bad kaei kaba u President ka VPP u mutdur ba kan jia, da lei-lei ruh kan ym jia.
