Shillong, Lber 05
U Steven Smith kapten ka Australia u la pynbna shongthait noh na ka jingïalehkai One Day International (ODI) cricket hadien ka jingshah rem noh ka kynhun ha ka semi final jong ka lympung Champions Trophy hynrei un dang bteng ban don ha ki jingïalehkai Test bad T20Is.
U Smith, 35 snem ka rta, u la pyntip ïa kane sha ki paralok jong u hadien ka jingshah rem noh ha ka India da 4 wiket ha Dubai ha ka Sngi Ba-ar ba katei ka dei ka jingïalehkai ODI ba khatduh jong u; kaba mut ba un ym don bynta shuh ha ka kynhun jong ka Australia na ka bynta ka ODI World Cup 2027 wat la u la ïeng kum u kapten na ka bynta ka Champions Trophy ha ka jingbym don jong u Pat Cummins.
“Ka la long ka jingïaid lynti kaba sngewtynnad bha bad nga sngewtynnad eh ïa kawei-pa-kawei ka minit jong ka”, la pynpaw u Smith ha ka kyrwoh. “Ki la don shibun ki por kiba sngewtynnad shisha bad ki jingsahkynmaw kiba sngewtynnad. Ka jingjop ar tylli ki World Cup ka la long ka jingïalehkai kaba khraw ryngkat bad kiba bun ki paralok ba tbit kiba nga la ïoh ban lehkai lang ha ka jingïaid lynti ki por lehkai.”
“Ka jingïalehkai test ka dang long kaba kongsan bad nga khmih lynti shisha ïa ka jingïalehkai phainal jong ka lympung World Test Championship, ban ïoh ïakhun ïa ka West Indies ha ka por tlang bad nangta ïa ka England ha la ïing. Nga sngew ba nga dang don shibun ban noh synñiang bad ban leh ei-ei ha kane ka rynsan ïalehkai.” la bynrap shuh shuh u Smith.
U Smith u la lehkai bad lamkhmat ïa ka Australia ha ki 64 sien jingïalehkai ODI naduh u snem 2015 haduh 2025 hynrei um pat shym lamkhmat ïa la ka ri na ka bynta ka World Cup.
U heh bathymmai jong ka CA, Todd Greenberg u la ai khublei ïa ka jingnoh synñiang jong u Smith sha ka kynhun ïalehkai ODI jong ka Australia ha ki 16 snem jong ka jingïalehkai jong u. “Khublei shibun ïa u Steve na ka bynta ka jingïalehkai kaba phylla ha ka jingïalehkai One-Day International career ha kaba u la noh synñiang shibun eh sha ka jingïalehkai jong ka Australia ha ka jingïalehkai kaba la kot sha ki 50 over.”
Ka ODI ban wan na ka bynta ka Australia la buh ba kan long ha ki series pyrshah ïa ka South Africa ha u Nailar. U Smith u la kular ban ïalehkai na ka bynta ka Welsh Fire ha ka Hundred ha kajuh ka por, bad un ïalehkai kham bun ha ka franchise cricket katba u nang jan sha kaba kut jong ka kam ïalehkai jong u.
