Shillong, Lber 05
Ka Shillong Lajong FC ka dang ïakhun tyngeh ban ïoh rah ïa ka nam lahduh jong ka OC Blue Shillong Premier League 2024 hadien ba ka la lah ban pynliem ïa ka Rangdajied United da 2-1 kol ha madan ïalehkai SSA First Ground, Polo, ha ka Sngi Balang ka 5 tarik Lber 2025.
Na ka bynta ka Lajong u Samchaphrang Lato (27′) bad u Iohborlang L Lyngkhoi (45’P) ki la long ki nongthep kol ha ka jingïalehkai bad u Benny Khriam (85′) na ka bynta ka Rangdajied.
Kano-kano kaba duna ban ïa ka jingjop mynta ka sngi kan jin da la aiti ïa ka khusnam sha ka kynhun ba hakhmat eh ka Mawlai SC bad ka kynhun kaba dang bat ïa ka nam lahduh ka dang lah ban ïohrah ïa ka nam lahduh kaba lai lynter ha ka OC Blue SPL da kaba jop ïa ka jingïakhun ban wan, ka ban long ha ka 10 tarik u Risaw. Kumba ka long mynta, ka Lajong ka don 42 point mynta, 2 point shadien ka Mawlai, ka Rangdajied ka don ha ka kyrdan balai ryngkat 32 point.
Ka kol kaba nyngkong ka dei kaba wan na u Rimankhraw Kharumnuid na ka bol ba wan pashat na liang kamon. U Deibormame Tongper u la pyrshang ban thep da ka khlieh na ka liang kaba sha jngai hynrei ïa ka bol la lah ban khanglad noh da u rangïalehkai shadien namar ba ka bol ka wan kham suki. Ka long donbok ïa ka Lajong, ba ka bol ka la hap ha ka jaka kaba biang bha na ka bynta u Samchaphrang ha ka ba u la lah ban thep kol da ka kjat ka diang.
Shuwa ka kylla step u Aibiangmame Nongneng u la pashat thurmur ïa ka bol sha u Deibor bad u la mareh haduh phyllaw kol. Namar bym don paralok shuh ban ïarap ïa u, u nongapkol ka Rangdajied u Kerichard L Marshillong u la mih ban kynrup bad pynsangeh pynban ïa u briew ym ïa ka bol, kaba la pynlong ïa u ban ïoh da ka penalty. U Iohborlang u la shim ïa kane ka kabu bad u la lah ban thep kol da kaba kynjat ïa ka bol shajrong ka jar kol.
Kaba kham kyrpang na ka bynta ki kynhun ha ka SPL ka long ba ka Rangdajied ka la shah thep bun kol ha ka kylla step ban ïa ka kylla miet – 8 sha 3 – kynthup san tylli kol ha ki lai tylli ki jingïalehkai ba la dep.
Ka Rangdajied ka don ïa ka khyllipmat ha ka kylla miet, ha kaba u Owanijuh Pajuh u la ïoh ban thep da ka khlieh ïa ka kol kaba la thep sha kaba thmu hynrei beit-beit ka poi sha u nongap kol ka Lajong u Siwel Rymbai bad la lah ban khang lad noh. Ka RUFC ka la ïoh ruh lai tylli ki lad ba jan urlong na ka corner kick kham hadien, ha kaba ar tylli ki jingpyrshang la khanglad bad kaba lai la kum rah noh sharud da u Aenam Jyrwa.
Dei u nongïalehkai bujli u Benny Khriam uba la lah ban pynïoh ïa ka shi kol, da kaba itynnad ban thep ïa ka bol kaba la shah leit shadien u Siwel. U Ieitlang Syiemlieh u la jan lah ban pynïakhaid hadien ar minit hynrei kam shym la long kumta bad ka Lajong ka la ïoh ban rah ïa ka jingjop, da kaba shu jia ryngkhat, ka long da kajuh ka rukom jingjop kaba ka la pynliem ïa ka Rangdajied ha ka jingïalehkai ba nyngkong ha u bnai Risaw jong u snem ba la dep.
Ha ka Sngi Palei 06 tarik 2025 ka Ryntih FC kan ïakhun pyrshah ïa ka Nongrim Hills SC ha ka por 3 baje janmiet. Kane kan dei ka jingïalehkai kaba khatduh na ka bynta baroh arliang mamla ha kane ka samoi ïalehkai. Lada jop ne ïakhaid kan kyntiew ïa ka Nongrim Hills na ka kyrdan kaba phra sha ka kyrdan kaba hynñiew. Ka Nongrim Hills ka la jop ïa ka jingïakhun kaba nyngkong pyrshah ïa ka klob kaba don ha trai duh ka Ryntih da 6-0 ha u bnai Nohprah jong u snem ba la dep.
