Shillong, Lber 05
U LeBron James u la kylla long rangïalehkai ba nyngkong ha ka khana-pateng jong ka National Basketball Association (NBA) ban ïoh haduh 50,000 poiñs haba kheiñ kyllum ha baroh ki lympung ïalehkai bad ïarap ïa ka Los Angeles Lakers ban poi sha ka jingjop ban pynliem ïa ka New Orleans Pelicans.
U LeBron ba la 40 snem ka rta na America, u la tam ïa une u mawmer ha kaba sdang jong ka ‘quarter’ ba nyngkong ha kaba ka kynhun jong u ka la jop da 136-115 pyrshah ïa ka New Orleans Pelicans, da kaba la lah ban pynurlong ïa ka bol ba la pashat da u Luka Doncic bad ban thep ïa ka nabar ka phyllaw kol, ha ka jingjngai kaba 25 phut ban ïoh ïa ki lai poiñs.
U James uba la lam khmat kum rangïalehkai ba ïoh bun poiñ tam ha ka khana-pateng jong ka lympung ïalehkai NBA, ha kaba u la pyndep ïa kane ka jingïalehkai da kaba ïoh 34 poiñ ban pynksan ïa ka jingkheiñ jong u kaba la kot sha ka 50,033 poiñ kaba pynïapher haduh 6,000 poiñ na u Kareem Abdul-Jabbar u ba wan ha ka kyrdan ba-ar.
“Nga long uba la kyrkhu shibun eh ban lah ban kynjoh sha kat kine ki poiñ ha ka jingim jong nga ha kawei na ki ‘league’ kaba biang tam ha ka pyrthei bad pyrshah ïa ki nongïalehkai kiba tbit tam ha ka pyrthei kane ka long kaba kyrpang bha.” la ong u James.
U khlur ïalehkai NBA barim uba la pawnam jong ka Lakers, u Earvin Magic Johnson, u la lamkhmat ïa ki jingai burom ïa u James ha ki rynsan social media hadien kane. “Ka jingïaroh ïa u King LeBron James uba la long tang ma u hi ha ka khana-pateng jong ka NBA ban ïoh 50,000 poiñ ha ka samoi ba long barabor bad ha ka playoff” la pynpaw u Earvin ha ka ‘X’.
Shuwa kane ha ka Sngi Ba-ar, u James u la shah jied ruh na bynta ka NBA’s Western Conference Player of the Month hadien ba u la ïoh 29.3 poiñ, 10.5 tylli ki rebound bad 6.9 assists ha u bnai ba la dep, ha kaba u la long u rangïalehkai ba rangbah tam ban ïoh ïa kane ka khusnam.
