Agartala, Lber:
Ki lehnoh barim kiba la pyndem ïalade da kaba shaniah ha ki jingkular jong ka sorkar ki dang ap ïa ka jingpyndep ïa ki jingkular ba la ai sha ki ha ki por bapher bapher.
Da ka jingsngewsih namar ka jingpynslem, ki la pynlong bunsien ïa ki jingïakhih da kaba khang ïa ka surok bah jong ka ri san sien ban khmih halor ki jingdawa jong ki.
Kham hadien eh, ha ka 25 tarik u, Rymphang, ki la pynlong da ka jingkhot pakhang ha Baramura da ka jingthoh jingdawa kaba don 21 tylli ki mat.
Ha ka jubab, ka bor synshar ka la pynthikna ïa ki ba u Myntri ka tnad Tribal Welfare u Bikash Debbarma un ïakynduh ïa ki ha ka 4 tarik, Lber.
Ha kaba ïadei bad kane, u Myntri u la pynlong ïa ka jingïakren ha ka sngi Ba-ar ha ryngkat ki nongmihkhmat jong ka kynhun ki lehnoh kiba la leit pyndem ïalade ha ki kti jong ka aiñ Tripura United Indigenous People’s Rights Council (TUIRPC) ha State Secretariat.
Ha ka jingïalang, ki lehnoh kiba la pyndem ki la pynpaw biang ïa ki jingdawa ba kongsan jong ki, kiba kynthup ïa ka jingpynbiang kyrkieh ïa ki ïing kumba la kular, ka jingkyrshan ba pura jong ka sorkar na ka bynta ka jingpule ba shalor jong ki khun jong ki bad ka jingweng noh ïa baroh ki mukotduma kiba dang sahteng pyrshah ïa ki.
“Ka sorkar ka la ai jingkular ïa ngi ha ka por ba ngi la leit pyndem, hynrei kita ki jingkular ki dang sah khlem urlong. Ngi pan tang ïa kaei kaba la kular”, la ong u nongmihkhmat jong ka TUIRPC.
U Debbarma u la pynthikna ïa ki ba ïa ki jingeh jong ki la shim khia bha. “Ka sorkar ka shimkhia ban weng ïa ki jingeh jong ki lehnoh kiba la leit pyndem. Ngin sa trei ban pynbeit kloi ïa ki jingeh jong ki”, u la ong.
Ki heh ophisar na ki tnad bapher bapher jong ka jylla ki la don lang ha kane ka jingïalang, ha kaba ki la ïakren ïa ki lad ki lynti kiba lah ban weng ïa ki jingdawa ba la pynpaw.
La khmih lynti ba ka sorkar kan shimkhia shuh shuh ha kine ki sngi ban wan ban pynbeit ïa ka jingeh kaba la slem bha jong ki lehnoh kiba la leit pyndem ïalade.
