Shillong, Lber 06
U Myntri Rangbah ka Jylla, Conrad K Sangma u la pyntip ba ka khyndew ba heh 137 akar ba la tyrwa pynkylla sha ka Industrial Estate ha Byrnihat kam dei satia ka jaka khlaw haba kular ruh ba ka Sorkar kan pynïaid shakhmat ïa ka kam tang ynda la ïoh ïa ka jingmynjur jong ki paidbah.
Haba ïatai lyngkot ïa kane ka mat ba la wanrah da u MLA ka VPP na Mawryngkneng, Bah Heavingstone Kharpran hapoh ka ïingdorbar ha ka Sngi Palei, u Myntri Rangbah u la pynshai ba kane kam dei satia ka jaka ba la ithuh kum ka khlaw haduh mynta.
“Kam dei satia ba ngi shu shim beit ïa kane ka jaka bad lashai-lashai hi kin mih ki karkhana. Ka kam kaba ngi sdang ïa mynta ka long ban aiti ïa ka jaka na ka tnat Soil & Water Conservation bad tnat Horticulture sha ka Sorkar”, u la ong.
U la pyntip ba ïa mynta ka tnat Horticulture ka dang pyntreikam ïa katei ka jaka ha kaba ai jinghikai. U la ong ba ki don 2-3 tylli ki jingai jinghikai ba dang ïaid ha katei ka jaka bad ka Sorkar ka sngew ba kane ka jaka ka dei ka bym da pyndonkam bha bad ïohi shibun kiei-kiei ba lah ban leh ha kane ka jaka kaba la pynlong ban rai ba ïa kane ka jaka dei ban aiti noh sha ka Sorkar.
U la ong ruh ba ïa kine ar tylli ki tnat yn sa ai bujli da kawei pat ka jaka hadien ba la aiti ïa katei ka jaka sha ka Sorkar.
U Conrad u la ïathuh ba ka jingheh jong kane ka jaka kam dei satia da ki hajar akar, hynrei ka dei 137 akar, ha kaba 127 akar ka dei jong ka tnat Soil & Water Conservation bad 10 akar pat ka dei jong ka tnat Horticulture bad 55.9% na kane ka jaka ka dei ka madan ba la ieh shrah.
U Myntri Rangbah u la ong biang ba ka jingkylli kam mih satia ba kan don ka jingïaid lait ïa ka aiñ bat khyndew ba ka Jylla ka don haba pyntreikam ïa ka Meghalaya Investment Promotion Agency (MIPA).
“Ka don ka jingsngewkhia ba ngin sa ai jaka sha ki kompani shimet bad ïaid lait ïa ka Land Transfer Act. Ka dei ka aiñ ba kongsan bha kaba ngi don bad kaba la ïada ïa ki paidbah jong ngi da ki snem bad ym don satia kino-kino ki agency kiba lah ban ïaid palat ïa kane ka aiñ ba la mynjur da kane ka ïingdorbar”, u la ong.
U Conrad u la ong ba kan ym don satia ka jingaiti ïa ka hok longtrai ïa ki jaka sha ka MIPA.
“Ki sienjam ba la pyntreikam ha ki por ba la leit noh lyngba ka MIDC, MeECL bad kiwei-kiwei ki long kumjuh hi. Ka jingkylli ba ka MIPA ka ïoh bor kyrpang ruh kam mih satia. Ïa ka MIPA la wanrah ban pynsuk ïa ka jingwan kynshew kam bad kan bud ïa kijuh ki kyndon ‘rule’ ba la bud da kiwei ki Agency jong ka Sorkar. Ka jingkylli ba ngin ïaid lait ïa ki paidbah, ki nongïalam shnong, ki aiñ ba ngi don kin ym mih satia”, la ong biang u Myntri Rangbah.
