Khliehriat, Lber 06
Ka Jaiñtia National Council (JNC) ha ka 6 tarik Lber ka la pynlong da ka rally rah lama ïong ban pyrshah halor ka lynti rel kaba thmu ban wanrah ha East Jaiñtia Hills District.
Kane rally ka la sdang najan ka skul Holy Family English School, Khliehriat ban ïaid lyngba ka surok bah haduh ha ophis u DC bad pynkut da ka jingïalang hakhmat motdur u Woh Kiang Nangbah.
Ha kane ka jingïaid rally la rah lang ruh ïa ki banner kiba thoh ‘Ngi kyntait ïa ka lynti rel, ka Jaiñtia kam dei tang ka tyllong pynmih khajna bad pyrta pyrshah ruh ïa ka projek lynti rel bad dawa ban pynïoh Government College, ki surok kiba kham bha bad ki jaka sumar kiba biang bad ïada ïa ka ri Jaiñtia khlem da wanrah ïa ka lynti rel ban suk ka lawei.
Ïa ka jingïalang hakhmat motdur u Woh Kiang Nangbah, la pynïaid da u Mehi Rymbai Art & Culture Secretary JNC bad la ïoh ka jingkren na ki dkhot seng ba kynthup ka JYF- Saipung Circle, MPUF- EJHD, FKJGP-Khliehriat Circle, All Biate Students Association, UHM- East Jaiñtia Hills bad East Jaiñtia Hills Taxi Driver Association nalor kiwei.
U Theodor Darnei Secretary ka All Biate Student Association bad u Oswald Nampui President ka JYF-Saipung Circle ki la pyntip ba ki briew jong ka Northeast Frontier Railways (NFR) ki la dep ban wan sorjamin ïa ka lynti rel sha thaiñ Saipung bad ki pynpaw ruh ka jingpyrshah jur namar ka ktah ïa ki jaka-puta jong ki nongshong shnong ka thaiñ kiba im lyngba ka rep ka riang. Ki la dawa ruh ba ha ka jaka jong ka lynti rel ka Sorkar ka dei ban pynïoh da ki skul, ki jaka sumar, ka surok bad kiwei-kiwei ki lad jingmyntoi namar haduh mynta ka thaiñ Saipung ka duna bha ha ka liang ka roi ka par.
U President ka JNC Sambormi Lyngdoh u la ong bun ki mat jingdawa kiba ïadei bad ka bha ka miat jong ka ri bad ka jaidbynriew ka Sorkar Pdeng ka pynslem hynrei haba ïadei bad ka lynti rel pat ka kloi. Kane ka pynsuba jur ïa ka seng lehse ka don jingthmu kaba na sha lyndet ne shah pynbor ha ki karkhana pynmih dewbilat kiba don hapoh ka district kiba don ïa ki ophis treikam baheh ha nongbah Delhi bad Kolkata.
U la ong ruh ba ka seng ka tip bha ba ka jingwan ka rel kan pynsuk ha ka ban kit ban bah ïa ki mar mata nabar hynrei ka jingkylli ka long u mar aiu kan kit, u mar jong ki bar jylla ne jong ki trai ri trai muluk namar kumba long mynta ki nongrep bad nongkhaïi trai ri kim pat lah ban pynmih ïa u mar ba hap ban pyndonkam ban kit da ka rel. U la ong ruh ba ka jingwan ka lynti rel kam dei ka jingmyntoi ïa ki paidbah hynrei ka dei ka jingthmu ba sha lyndet ka ban pynmyntoi bad pynhun tang ïa uwei ne arngut.
Tang ka rel ym pat don hapoh ka thaiñ, haduh katne ka jingroi jong ki bar Jylla bad lada wan lei lei sa ka rel tang ban pynlong rally ruh ka la buh jingma bad long kum ha ka Jylla Tripura, la ong u Sambormi Lyngdoh.
Baroh ki nongkren kynthup naduh u President ka FKJGP-Khliehriat Circle Michal Chyrmang, President ka MPUF-East Jaiñtia Hills Kyrshan Blah, ka President Meghalaya Indigenous Women’s Council ka Kong Bythygrace Dkhar, President UHM East Jaiñtia Brosent Siangshai, General Secretary JNC Wanchwa Suting ki la dawa na ka Sorkar Jylla ba kan pynsangeh noh ïa ka jingthmu wanrah lynti rel sha East Jaiñtia Hills bad ban pynbha pat ïa ki skul, ki jaka sumar, bad ki surok kiba la jot rathai khamtam ka surok bah ha ka thaiñ Narpuh.
Ki la pynpaw ruh ba ka jingpyrshah ïa ka lynti rel ka dei halor ka nongrim bym pat biang ki aiñ kiba skhem ban ïada ïa ka jaidbynriew ritpaid bad da ka jingwan ka lynti rel kan buh jingma ïa ka ri bad ka jaidbynriew na ka jingwan buhai shnong ki bar Jylla.
Shwa kane, ha ka jingïaid paidbah ki nongïaid rally ki la bthah ruh ïa ki dukan bar jylla ban khang ïa la ki dukan katba ym pat kut ka jingïalang ka jong ki.
