Shillong, Lber 07
Ka Real Sociedad bad ka Manchester United ki la ïakhaid mar 1-1 kol ha ka pre-quarter final jong ka Europa League ha ka Sngi Palei ha San Sebastian, katba ka Tottenham Hot-spur ka la shah pynliem noh da 1-0 kol ha ka AZ Alkmaar.
Ka United ka la lamkhmat ban pynkhih jar nyngkong haba u Joshua Zirkzee u la thep nabar jong ka ‘box’ ha ka minit kaba 57, hynrei u Mikel Oyarzabal u la lah ban pynïakhaid lyngba ka penalty hadien ba u Bruno Fernandes u la kum pyndei da ka kti ïa ka bol hapoh ‘box’.
Kane ka jingïalehkai ka la long hadien ka por kaba eh bha ïa u Zirkzee, uba la pynlehnohei ïa ka penalty bad ban mad ïa ka jingshah rem ha ka Fulham ha ka FA Cup ha ka taïew ba la dep. Ka samoi ïalehkai ka la ïatyngkhuh ïa ka United, ha kaba ka lad kaba dangsah ha ka jingïakhun jong ka Europa League.
Kane ka long ka kol kaba nyngkong eh na ka bynta utei u rangïalehkai ha kane ka aïom, ha kaba u la ïoh ban shut najngai kumba 20 yard hadien ka jingïarap pynbuh bol da u Alejandro Garnacho.
Hynrei katei ka kynhun ïalehkai jong u Ruben Amorim ka la duh ïa ka jingjop hadien ba u Fernandes u la kum pyndei da ka kti ïa ka bol ha ka por ba shut na kyndong (corner) kaba pynlong ïa u Oyarzabal ban pynphai kylla lyngba ka penalty.
U Andre Onana u la ïai bteng ban ïalehkai bha kumba u la lah ban kem ïa ki ar tylli ki jingpyrshang ka Real Sociedad kaba la khmih lynti ban ïoh jingjop. Te kumta u donkam ban ïalehkai bha ruh ha ka wat ba ar ka ban long ha ka taïew ban wan.
Ha kawei pat ka jing-ïakhun, ka jingthep bakla da u Lucas Bergvall ka la pynlong ïa ka Tottenham ban mad ïa ka jingshah rem ha katei ka kynhun kaba na Netherlands.
Katei ka jingthep kol ka la buh jingeh na ka bynta katei ka kynhun jong u Ange Postecoglou lada ym dei namar ki lai tylli ki jinglah u Gugliel-mo Vicario ban pyllait na ka jingshah thep.
Ha Italy, u rangïale-hkai ka Uzbek, u Eldor Shomurodov, u la lah ban pynkut ïa ka kol kaba itynnad bha, da kaba thep na ka bynta ban pynlong ïa ka AS Roma ban jop da 2-1 ïa ka Athletic Bilbao.
U Paulo Dybala u la ïoh ban shut ha kaba ka la leit dei na diengkol na ka bynta ka Roma ha shuwa ba u Inaki Williams un pynïakhaid ïa ka Athletic. U Angelino u la pynkhih jar nyngkong na ka bynta ka Roma, bad ïa ka kol kaba ar la thep da u Shomurodov, uba la pyntikna ïa ka jingjop.
Ha ka jingïalehkai ha Ajax, ka Eintracht Frankfurt ka la lah ban khie im biang na ka bynta ban khur ïa ka jingjop da 2-1 kol, ha kaba u Hugo Larsson bad u Ellyes Skhiri ki la thep kol hadien ba u Brian Brobbey u la thep nyngkong ïa ka kol ha ka 10 minit.
Ha kawei pat ka jingïakhun, ka Bodo/ Glimt ka la pynliem ia ka Olympiakos da 3-0 kol.
