Shillong, Lber 07
Ka Laitkor SC ka la ïasam mar shi poiñ bad ka Nangkiew Irat SC ha ka Shillong Premier League 2024 hadien ba ki la ïakhaid mar 3-3 kol ha ka Sngi Thohdieng ha SSA Stadium kaba ha First Ground, Polo.
Ha kane ka jingïakhun ka Nangkiew Irat ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Damehun Syih (7′). Kane ka kynhun ka la pynbud biang sa ar kol lyngba u Jefferson Pakynteiñ (17′ & 27′) na ka bynta ban tam 3-0 kol ha ka kylla step.
Hynrei hadien ba la bteng ïa ka jingïakhun jong ka kylla miet ka Laitkor ka la lah ban pynphai kylla shi kol lyngba u Risuk Malngiang (55′). Ïa kiwei pat ar kol la thep da u Fridison Wanñiang (69′ & 75′) na ka bynta ban ïakhaid mar lai kol.
Lyngba kane ka jingïakhaid ha kane ka jingïalehkai kaba khatduh ka la pynlong ïa ka Nangkiew Irat ban ïai sah ha ka kyrdan kaba saw ryngkat 26 poiñ. Katba ka Laitkor kaba dang sah sa kawei ka jingïalehkai ka don ha ka kyrdan kaba hynriew ryngkat 24 poiñ. Te kumta ka Laitkor ka la ïaryngkat mar 24 poiñ bad ka Langsning FC, kaba la don ha ka kyrdan kaba san.
Kane ka lympung kan bteng biang ha ka Lah Sngi U Blei ha kaba ka Laitkor kan ïakynduh pyrshah ïa ka Mawlai SC ha ka por 3 baje janmiet. Ka Mawlai ka la jop teng ïa ka Laitkor da 1-0 kol ha ka 4 tarik u Kyllalyngkot.
