Shillong, Lber 07
Wat hadien ka jingpyntreikam ïa ka National Education Policy (NEP) ha ki jaka pule bapher-bapher, hynrei ka jingpynrung ïa ka sobjek Physical Education kaba dei ka sobjek kaba donkam ban pynrung hapoh ki jaka pule kam pat urlong satia haduh kine ki sngi ba mynta ruh. Kumta na ka liang ka Meghalaya Physical Education & Sports Association (MPESA) ha ka 7 tarik u Lber, 2025 ka la leit ban wad jingtip kham bniah halor kane ka bynta na ka Sorkar Jylla.
Kane ka synjuk ha ka jingïalam ka Vice President ka Dr. Ïadarika Wann, u General Secretary, Bah Sunny B. Warjri bad ha ka jingsynran u Adviser, Bah Kyrmenlang Uriah ki la leit ban ïakynduh ïa u Commissioner and Secretary ka tnat Education, u Vijay Kumar Mantri hapoh ka shlem treikam jong u kaba don ha Additional Secretariat.
Ha kane ka jingïoh ban ïakynduh ïa u Commissioner and Secretary, na ka liang ka synjuk ka la pynpaw ïa ka jingkyndit bad ka jingsngew lyngngoh ban ïoh jingtip ba na ka liang ka tnat pule-puthi ka khlem pat shim ïa kane ka sobjek kum kawei na ki sobjek kaba donkam ban ai jinghikai sha ki khynnah bad ki samla pule.
Haba kren sha ki lad pathai khubor, u Bah Sunny B. Warjri, u la pynpaw ïa ka jingsngewtynnad halor ka jingïoh ban ïakynduh ïa u Commissioner & Secretary ban ïakren sani bha halor kane ka bynta ha kaba na ka liang ka synjuk ka la ïoh ban pynsngew ruh ïa shibun ki jingeh kaba ki mad bad na ka liang u Commissioner ruh u la kular ba un shimkhia mardor halor kane.
Shuh-shuh, u Bah Sunny u la pynpaw ruh ïa ka jingsngewdiaw ban ïoh jingtip ba u Commissioner & Secretary um ju ïohpdiang satia ne ïoh jingtip eiei haba ïadei bad ka jingphah shithi ka synjuk sha ki ophisar ka tnad pule-puthi.
“Lada kim treh ban ïatreilang ka long kaba jynjar hynrei ngi na ka liang ka synjuk na ka por sha ka por ngi leit ban mih bad wad ïa ki jingtip bad pynpoi ïa ki shithi, hynrei ngim tip pat shano kata ka shithi ka poi”, ong u Bah Warjri.
Nalor kata, ka synjuk ha ka jingïakynduh bad u Commissioner bad Secretary ki la pyntip ruh ïa u halor ka jingbym biang ka rukom thungkam ha kaba ïadei bad kane ka kam namar dang ha u snem ba la dep, haba ka lait ka kam ha DIET, kiba thungkam wat haba ki tip ba ki don ki samla kiba la pyndep ïa ka jingpule Physical Education hynrei haba la pynmih ïa ka resol pat, kiba shah thungkam kim dei kiba don ïa ka jingtip bad kane ka jingpule hynrei da kiwei pat ki kyrdan pule.
Shuh shuh, ki la ong ba ha ka jingïakynduh ki la ïoh ruh ban kdew halor ka jingdon ki skul ki bym kwah ban don ïa kane ka sobjek ha ki skul kaba na ka liang u Commissioner and Secretary u la kular, ba shen yn sa pynmih ïa ka hukum ba ki skul baroh hapoh ka Jylla ki dei ban don noh ïa katei ka sobjek bad ban thung noh da ki nonghikai kiba la pyndep ïa kane ka jingpule naduh ka Diploma haduh ka Doctorate bad ka NET.
