Shillong, Lber 09
Ka India ka la pynliem noh ïa ka New Zealand da 4 wiket na ka bynta ban rah ïa ka nam lahduh ha ka sien kaba lai ha ka ICC Champions Trophy 2025 ha ka sngi U Blei ha Dubai International Stadium.
U kapten ka kynhun u Rohit Sharma u la lah ban khyrwit ïa ka shiteng spah kaba 76 run,, katba u Shreyas Iyer (48) bad u KL Rahul (34 not out) ki la lah ban pynurlong ban kynjoh sha ka thong ha ki 49 over.
Ka India ka dei ka kynhun kaba la jop lang (joint-winners) ha ka Champions Trophy ha u snem 2002 shwa ba kan rah biang ïa ka nam lahduh ha u snem 2013. Mynta, ka la pynkut noh ïa kane ka lympung sa shisien pat da ka khur biang ïa ka trophy.
Shwa ïa kane, ki nongkawang bol ka India ki la lah ban ïalehkai bha, kaba la ïarap ïa ka India ban khanglad ïa ki nongtied ka liang pyrshah na ka bynta ban kamai 251 run bad shah pynhap 7 wiket. Kane ka kynhun hapoh ka jingïalam u Mitchell Santner kum u kapten kaba la jop ïa ka jingkynting pisa bad ka la jied ban tied nyngkong. U Kuldeep Yadav (2 for 40) bad u Varun Chakravarthy (2 for 45) ki la lah ban khur mar 2 wiket, katba u Ravindra Jadeja bad u Mohammed Shami ki la shim mar shi wiket.
Te kumta ki ar ngut ki nongtied kane ka kynhun kiba la lah ban khyrwit ïa ki shiteng spah ki kynthup ïa u Daryl Mitchell uba tied 63 na ki 101 run (3x4s) lem bad u Michael Bracewell uba la ïoh 53 run na ki 40 bol (3x4s & 2x6s).
