Shillong, Lber 09
Ka long kaei-kaei kaba sngewkmen bad kaba sngew sarong kaba khraw bha ïa ka Dorbar Shnong Lumdiengjri baroh kawei hadien ar ngut na ki nongshong shnong ka shnong ki la ïoh ïa ka jingjop ha ka ilekshon MDC sha ka Khasi Hills Autonomous District Council (KHADC) kaba dang shu dep shen ha u bnai Rymphang mynta u snem.
Kumta kum ka dak ka jingpynpaw ïa ka jingaikhublei ïa kine ar ngut ki MDC bathymmai kiba dei napoh ka shnong, na ka liang ka Dorbar Shnong Lumdiengjri ha ka 8 tarik u Lber, 2025 ka la pynlong da ka prokram pynkup burom ha ryngkat ka jingai sngewbha ïa kitei ar ngut ki MDC bathymmai.
Kitei ar ngut ki MDC kiba dei na ka Voice of the People Party (VPP) ki long u Bah Strong Pillar Kharjana uba la ïoh ïa ka jingjop kum MDC na 18-Mawkhar Pynthorumkhrah konstitwensi bad u Bah Denzil Raynard Chen na 19-Jaïaw Mawprem konstitwensi.
Haba ai jingkren ha katei ka sngi, u Rangbah Shnong ka Lumdiengjri, Bah Willy Ïangngap, u la ong ba kum ka shnong ka dap da ka jingsngewkmen kaba khraw ban ïoh haduh ar ngut ki nongmihkhmat kiba dei napoh ka shnong bad ong ba kane ka long ka jingthaw histori hapoh ka shnong namarba ha ki por kiba la dep ym pat ju don ki nongmihkhmat kiba dei napoh ka shnong hynrei ha kane ka kynti kaba mynta pat, ki la mih haduh ar ngut syndon ki nongmihkhmat.
“Mynta ngi ïoh syndon haduh ar ngut ki nongmihkhmat bad kane ka long shisha ka jingsarong ïa ka shnong baroh kawei”, ong u Rangbah Shnong.
U Rangbah Shnong u la pynpaw ka jingsngewkmen ruh ban ïohi ba ka Executive Committee (EC) bathymmai hapoh ka KHADC ba la ïalam da ka VPP, ka la kren shai ruh ha kaba ïadei bad ka jingtehlakam ha ka ban ai ïa ka laisen khaïi sha ki bar jylla bad ong ba kane ka la ai mynsiem shikatdei eh ïa ka Dorbar Shnong Lumdiengjri namar kumba ka long, ki don bun ngut ki nongkhaïi kiba dei ki bar jylla bad na ka liang ka shnong, ka la khang ïa ka ban ai Trading License bad NOC sha kitei ki bar jylla.
“Mynta ngi sngew shngaiñ haba ngi ïohi ba kane ka EC bathymmai hapoh ka District Council ki don ïa kajuh ka jingthmu ïa kaei kaba ngi la shim kum ka sienjam ba ngin khang ïa ka jingai laisen khaïi bad NOC sha ki bar jylla, ngi dang sngewïoh mynsiem shuh-shuh ba kum ka Dorbar Shnong ban ïohi ïa kane bad ngi kyrmen skhem ba kane kan long kawei na ki lad ai kam-ai jam ïa kiba bun ki khun samla jong ngi”, bynrap u Rangbah Shnong.
Ha kane ka sngi ka la don ruh ka jingpynbyrngia da ki sur jingrwai bad ki jingshad ïa kaba la ai da ka Seng Samla.
