Shillong, Lber 09
Ka Mohun Bagan Super Giant ka la rakhe ïa la ka jingjop ha ka ISL League Shield hadien ba ka la lah ban pynliem noh ïa ka FC Goa da 2-0 kol ha ka jingïalehkai ba khadduh jong kane ka lympung ha Salt Lake Stadium ha ka sngi Saitjaiñ.
Kane ka nam jop ka la wan urlong lyngba ka kol ba la kum thep hi da u rangïalehkai ka FC Goa u Boris Singh (62) bad kawei pat da u Greg Stewart (90+4) na ka bynta ban pynlong ïa ka Mohun Bagan ban tam haduh 8 point ïa ka Goa.
Kane ka jingjop ka la pynlong ïa ka Mohun Bagan ban kamai 56 point na ki 24 sien ïakhun ha kane ka lympung, katba ka Goa ka la ïai sah ha ka kyrdan ba-ar bad kamai 48 point na ki 24 sien ïakhun.
Ha kane ka jingïalehkai ka Mohun Bagan ka la thaw sa ar tylli ki mawjam ha ka jingïakhun – da kaba pynurrung ïa ka jingjop kaba bun tam kata 17 sien bad ka la long ka kynhun kaba khlem shah rem ha ki jingïalehkai ha la ka ïing da kaba ka la jop 11 sien bad ïakhaid shisien.
Ka Goa ka la sdang ban ïalehkai bha bad ka la pyni ïa ka mynsiem ïakhun ha ka kylla step. Wat la ka la ïoh ïa ki kabu kiba biang ban pynkhih jar, hynrei kam shym la lah ban pynurlong na ka daw ka jingpynlehnohei ïa kitei ki kabu.
Ka Mohun Bagan ka la ïoh ban pynkhih jar ha ka kylla steo, hynrei ïa ka kol ba la thep da u Manvir Singh la kyntait noh ha u rephri. Hynrei dei ha ka kylla miet ba ka Mohun Bagan ka la lah ban pynurlong lyngba ka jingbaakla uwei na ki rangïalehkai dien ka Goa u Boris, uba dangthmu ban pyrshang ban pyllait na ka jingshah thep.
Shuh shuh kham hadien ka Mohun Bagan ka la pynbud biang ïa ka kol kaba ar lyngba u Stewart saw minit shwa ban wai bad ban khur syndon ïa ka jingjop.
