Shillong, Lber 09
Ka Mawlai SC ka la don jingkyrmen ba kan rah biang ïa ka nam lahduh ha ka sien kaba lai ha ka Shillong Premier League 2024. Kane ka kynhun kan pynkhreh ban ïakhun pyrshah ïa ka Laitkor SC mynta ka Lah Sngi U Blei ha SSA Stadium kaba ha First Ground, Polo ha ka por 3 baje nohphai sngi.
Wat la ka la long ka kynhun kaba khlem pat shah rem ha kane ka aïom, ka Mawlai haduh mynta ka la jop 14 sien na ki 16 sien ïakhun bad ka dangsan sa ar tylli ki jingïakhun.
Lada ka lah ban pynliem ïa ka Laitkor, katei ka kynhun hapoh ka jingïalam u Bah Hering Shangpliang kan don 47 poiñ bad kan buh jingeh ïa ka Shillong Lajong FC kaba don ha ka kyrdan ba ar ryngkat 42 poiñ ba kan beh ïa ka thong.
Hynrei ym lah ban kheiñ sting ïa ka Laitkor. Haba ïalehkai ha ka jingïakhun kaba nyngkong jong kane ka lympung, ka la lah ban pynpaw ïa ka jingtbit ha kaba la lah ban jop da 2-0 kol pyrshah ïa ka Rangdajied United FC ha u bnai ba la lah. Ka la ïakhun tyngeh pyrshah ïa ka Mawlai ha ka wat kaba nyngkong bad ka la rem noh 1-0 kol. Ka Laitkor ruh ka don la ka jong ka rukom ïalehkai. Lada ka lah ban pynïakhaid ka la lah ban jam na ka kyrdan ba hynriew sha ba san, hynrei lada ka lah ban khur jingjop kan pynlong ïa ka ban jam sha ka kyrdan basaw.
Lada ka Mawlai kam lah ban ïoh jingjop, kan hap ban ap ïa ka rai kaba khatduh ha ka jingïakhun pyrshah ïa ka Lajong ka ban long ha ka sngi Saitjaiñ .
Ka Mawlai ka dei ka kynhun kaba bat teng ïa ka nam lahduh ha ka aïom ïalehkai 2022 bad 2023. Te kumta kane ka kynhun ka la khmih lynti ban rah biang ïa ka nam lahduh ha ka sien kaba lai ha kane ka lympung.
Ha kawei pat ka liang, ka Lajong ka dei ka kynhun kaba la bat ïa ka nam lahduh saw sien ha ka SPL (2014, 20152, 016 bad 2019) hynrei ha kane ka lynti kaba mynta ka la khmih lynti ban khur ïa ka jingjop kaba san. Te kumta kane ka kynhun kan hap ban ap na ka jingmih jong kane ka jingïakhun hapdeng ka Laitkor bad ka Mawlai.
