Shillong, Lber 09
Ka Hynñiewtrep Youth Council (HYC) ka la dawa na ka tnad ka koit ka khiah ka Sorkar Jylla ban pynsangeh shuwa ïa ka jingkhot thung kam haba ïadei bad ka kam ‘Medical Physicist-cum-Radiation Safety Officer’.
Ha ka jingïakynduh bad u Secretary ka tnad ka koit ka khiah, u Dr. Joram Beda ha ka taïew ba la dep, ka seng ka la pynsngew ba ka Meghalaya Medical Service Recruitment Board (MMSRB) ha u snem 2024, ka la pynmih ïa ka jingpynbna haba ïadei bad ka jinglait jong kane ka kam.
“Ha ka jingpynbna lait kam kaba nyngkong, ka la buh tang ïa ka ‘Reserved Seat’ na bynta ki Khasi-Jaiñtia ban thep ïa kane ka kam. Hynrei kaba pynlyngngoh bad pynkyndit ïa ngi ka long ba ha u taïew ba la dep, la pynmih biang ïa kajuh ka jingpynbna lait kam (lyngba ka MMSRB), ha kaba la pynkylla pat ïa kata ka ‘Reserved Seat’ sha ka ‘Unreserved Seat’,” ong u nongïalam ka seng, samla Enlang Sawian haba kren sha ki lad pathai khubor.
U la ong ruh ba lyngba kane ka jingpynkylla, mynta ïa kane ka kam kaba la bhah na bynta ki Khasi-Jaiñtia, yn ïoh ban ïashim bynta lang da ki kyrtong kiba dei ki bar Jylla kiba la bit la biang ban thep ïa kane ka kam.
Haba kdew ba ka seng ka la ïoh ban ïamir halor kane ka mat bad u Secretary, u samla Sawian u la ong ba ka tnad ka la pynsngew ba ka kam shym la don kano-kano ka jingleh shiliang bad na ka liang ka MMSRB ka la dep ban pyllait ïa kane ka jingpynbna lait kam la 6 sien.
“Hynrei ha kine ki hynriew sien, la don tang lai sien. bad ki la don ki samla Khasi-Jaiñtia kiba la thep. Ki dei kiba la pyndep ïa ka ‘MSc Physics’ tangba kim dei pat kiba la pyndep ïa ka ‘Medical Physics’ bad kim don ïa ka syrnot Radiation Safety Officer (RSO),” u la ong da kaba bynrap ba dei halor kane ka nongrim, ka tnad kam banse ban pynkylla noh sha ka ‘Unreserved Seat’ khnang ban plie lad ïa kiwei pat ki kyrtong kiba la bit la biang na bynta kane ka kam.
Naba kane ka kam ka ïadei bad ka jingshakri ïa kito kiba ïoh ïa ka jingpang bampong, u samla Sawian u la ong ba haduh mynta, ym pat don ïa ki RSO kiba la skhem ha ka kam bad kane kan sa buh jingeh shi kat dei ïa ka tnad ka koit ka khiah ban sumar ïa ki nongpang.
Halor ka kor MRI bathymmai ban ai jingsumar ïa ki nongpang bampong, une u nongïalam u la ong, “Kumta ka tnad ka la ai lad khnang ban pynsted bad pynkloi ha ka ban thung ïa ki briew khnang ba kan long ka jingmyntoi na bynta ki nongpang bampong kiba donkam ïa ka jingsumar lyngba kane ka kor MRI.”
Katba ka seng ka pdiang bad mynjur ïa ka jingpynshai na ka liang ka tnad, ha kawei ka liang, ka dawa ban pynsangeh shuwa (ïa mynta) shipor ïa ka jingkhot thungkam bad ban ai ïa ka jingpynjlan por.
“Katkum ka jingtip jong ngi, ki don ki kyrtong – don uwei u kyrtong uba la shah thung ha shuwa kum u nongtrei kontrak hynrei tang namarba ka tnad ka slem ban pynmih ïa ka jingpynbna lait kam na bynta ka ‘Permanent Post’, u la hap ban leit trei noh shabar. Ngi la ong ïa ka tnad ba kan sangeh shuwa bad ngin ïakren ruh bad ki kyrtong Khasi-Jaiñtia kiba la bit la biang ba kin wan ban thep ïa kane ka kam,” u la ong.
Shuh shuh u la bynrap, “Lada don ki samla Khasi-Jaiñtia kiba la pyndep ïa la pyndep ïa ka ‘MSc. Physics’ bad kiba la pyndep ïa ka ‘Diploma’ ha ka ‘Medical Physics’ ha ryngkat ka syrnot RSO, ki dei ban wan thep ïa kane ka kam. Lada don ki samla Khasi-Jaiñtia kiba lah ban thep ïa kane ka kam, na ka liang ka tnad ka la kular ba kane ka kam kan leit tang sha ki trai Jylla bad ym sha ki bar Jylla.”
