Nongstoiñ, Lber 10
Da ki bun byrni ka kyiad pyrsi lem bad ka kyiad phareng la ïoh ban kurup da ka Village Defend Primary Committee Nongstoiñ Area (VDPCNA) na katto-katne ki bynta hapoh ka ïew Nongstoiñ hadien ba ka la pynlong ïa ka jingkhynra ha kine khyndiat sngi ba la dep.
Ïa kine kyiad beaiñ ba la ïoh ban kurup noh, ka VDPCNA ka la pynjot da kaba theh noh ha ka sngi nyngkong jong ka taïew ha ka jingdon lang ki dkhot jong ka.
U President ka VDPCNA Bah Mawkordor Kharsyiemlieh u la ong, ka VDPCNA ka kyntu bad ka maham jur ïa kino-kino ki briew kiba die kyiad beaiñ, dih drok bad ki nongleh ïa kino-kino ki kam sniew hapoh ïew Nongstoiñ bad khamtam eh ïa ki nongtuh kiba lied ïa ki dukan manla ki por ba kan leh da kaba tyngeh lada lap.
“Ka VDPCNA ka maham ba lada yn dang ïai lap kan ym map,” ong u Bah Mawkordor da kaba u la bynrap ruh ba ka VDPCNA nangne shakhmat kan pynlong ka jingpeitngor ban rat dyngkhong ïa ki jingsniew ha ki bynta bapher bapher jong ka ïew bad ha kylleng ki jaka ka sor Nongstoiñ.
U la ong ba ka VDPCNA, kan ïai peitngor ïa ki jingsniew kam dei tang hapoh ka ïew Nongstoiñ hynrei ïa baroh ki shnong kaba ka la shimti, bad kan ïai pynlong ka jingpeitngor ban pynduh jait ïa kine ki kam sniew kiba ïai jyllei na ka por sha ka por khnang ba kan shong shngaiñ ïa kiba ïaid kiba ïeng, ïa kiba shong ïew kan wan biang.
U la ïathuh ruh ba kumba long mynta ki nongshong ïew tang ha ka por 6 baje janmiet ki la hap ban khang noh ïa la ki dukan namar ka jingtieng. Kumta na ka liang ka VDPCNA kan ïai ïaleh ban pynduh jait ïa ki jingsniew.
Ha kajuh ka por ka kyntu ruh ïa kino-kino ki briew ba kim dei ban leit ïa shong dih kyiad, ïa shong dih drok hapoh kane ka ïew nangne shakhmat bad lada yn dang lap, ka VDPCNA kan leh da kaba tyngeh.
