Shillong, Lber 10
U Nongïalam ka Congress uba dei u MLA na Mylliem, Bah Ronnie V Lyngdoh u la kyntait war ïa ka khubor ba un leit pynïasoh noh sha ka National People’s Party (NPP), da kaba u la ong ruh ba ka dei tang ka khubor hamsaïa.
Ka khubor kaba la pur stet bha ha ki khyndiat sngi ba la dep ka pynpaw ba u Bah Ronnie ruh un phet noh na ka Congress kumba la leh da 3 ngut ki MLA ban pynïasoh sha ka NPP.
Haba kren ha ka Lah Sngi U Blei halor kane ka khubor, u MLA ba marwei ka Congress da ka khmat phuh samrkhie u la ong, “Nga ïoh jingtip na phi ki lad pathai khubor. Ka mih ha ki lad pathai khubor, ka khlem mih nangno-nangno ruh kaba ki shu mutdur, bad ka dei tang ka jingmutdur”.
Lah ban kdew ba 3 ngut ki MLA ka Congress ba kynthup ïa u Bah Charles Marngar na Mawhati, Bah Gabriel Wahlang na Nongstoiñ bad u Dr. Celestine Lyngdoh na Umsning ki la phet noh na ka Congress bad pynïasoh sha ka NPP ha u snem ba la dep.
Haba kylli halor ka jingïoh nod ka Congress ha ka ilekshon MDC sha KHADC kaba dang shu dep shen, u Bah Ronnie u la ong ba ha ka ilekshon ka dei ka bor jong u paidbah, bad kaei kaba u paidbah u rai hap ban pdiang ïa kata.
U la ong ka seng kan sa shong ïa ka jingïalang ha ki khyndiat sngi ban wan ban bishar ïa ki dawa ba khlem jop wat tang ha kawei ka konstitwensi ruh ha KHADC.
“Ki bun ki daw bad ngin hap ban peit bad bishar, ngin sa don ka jingïalang ban wad ïa ka dawa kaba pynlong ïa ka seng ba ngim lah ban jop tang kawei ka seat ruh”, la ong u Nongïalam ka Congress.
Lah ban pynpaw hangne ba ha ka ilekshon MDC ba dang shu kut ha ka 24 tarik Rymphang, ka Congress kaba la sei haduh 28 ngut ki kyrtong ha KHADC ka la bam nod bad khlem jop wat tang uwei ruh u MDC sha KHADC, katba ha Jaiñtia Hills ba ka la sei 20 ngut ki kyrtong ka la jop tang ha 3 tylli ki konstitwensi.
