Jowai, Lber 10
Ka Pohplet FC ka la lah ban pynthikna ban rung sha ka semi final ha ka lympung ïalehkai ’11th Secondary School Football Knockout Tournament 2024-25′ ba la pynïaid da ka Dorbar Shnong Pdengshakap.
Kane ka la wan hadien ba ka la lah ban pynliem noh ïa ka Azad A FC 2 lyngba ka tie-breaker da 6-5 kol ha ka jingïakhun quarter final kaba la long ha ka Sngi Saitjaiñ ha madan Pdengshakap hadien ba kitei ki kynhun kim shym la lah ban thep kol haduh ba kut ka jingïalehkai.
Ki kynhun kiba la rung semi final ki long ka Nangbah Mulang SC, KSF FC bad Pohplet FC.
Ka jingïalehkai quarter final kaba khatduh kan long ha ka 15 tarik mynta u bnai hapdeng ka Namrhenlang-i FC pyrshah ïa ka YC Pdengkarong ha ka por 2 baje nohphai sngi.
