Washington, Lber:
U nongmihkhmat jong ka US uba la pynlong ïa ka jingïakren bad ka Hamas kaba khlem pat ju jia mynno mynno ruh, u la ong ha ka Sngi U Blei ba ka jingïalang ka la long kaba seisoh shibun bad u ngeit skhem ba ka lah ban poi sha ka jingïateh soskular ban ioh pyllait noh ïa baroh ki nongshah rahbor tang hapoh jong kine ki khyndiat taiew ki ban wan.
Haba ïakren bad ki nongthoh khubor ha katei ka sngi, U Adam Boehler u la kam ba kum u nong Jiw-America ka la long kaba phylla ban ïashong markhmat bad ki nongïalam jong ka kynhun kaba ka America ka la buh kyrteng kum ka seng lehnoh naduh u snem 1997, hynrei um shym la kyntait ban ïakynduh shuh shuh bad ki ehrang Palestine.
U Boehler u la ong ba u sngewthuh ia ka jingsngewsih jong ka Israel ba ka America ka la pynlong ia ka jing-iakren satia bad katei ka kynhun, hynrei u la ong ba u la wad ban sdang noh ia ka jingiakren kaba “rit”.
Ka Hamas ka la leit hiar thma ia ka Israel ha ka 7 tarik u Risaw jong u snem 2023, ha kaba ka la rahbor ia palat 250 ngut ki briew na Israel kynthup ruh ia katto- katne ngut ki bym dei ki nongshong shnong jong ka Israel. Kumta, la buh jingkheiñ antad ba kin don sa kumba 58 ngut eiei ki nongshah rahbor kiba dang sah ha ka kti jong ka Hamas hapoh Gaza tad haduh kane ka kynti.
Kumjuh, na ka liang ka Israel ka la leit hiar thma ia ka Hamas sha nongbah Gaza kum ka jingpynrem bad ka jingpynhiar kput bad kaba la wanrah ruh ia ka thma kaba khlem lah shuh ban pynsangeh bad kaba la iai bteng mynta la palat 15 bnai bad kane ka thma ka la pynkylla phetwir ia baroh ki paidbah nongshong shnong ka nongbah Gaza.
Ha ka taiew ba ladep, U President jong ka US, U Donald Trump, u la byrngem tyngeh ban pynjot arshah ïa ka nongbah Gaza, lada ka Hamas kam pyllait ïa baroh ki nongshah rahbor kiba dang sah ha ka kti jongka, da kaba pynmih ïa kaei kaba ula khot ka “jingmaham ba khatduh” sha ki nongïalam ka Hamas.
