Shillong, Lber 10
Ka Mawlai Sports Club ka dang hap ban ap ïa ka jingïakhun kaba khatduh pyrshah ïa ka Shillong Lajong FC ka ban long ha ka 15 tarik mynta u bnai na ka bynta ban pynthikna ban rai ïa ka nam lahduh ha ka sien balai jong ka Shillong Premier League.
Ha ka jingshisha ka Mawlai ka la dei ban rah ïa ka nam lahduh ha ka Lah Sngi U Blei, hynrei ka la ïakhaid pynban bad ka Laitkor mar 2-2 kol ha SSA Stadium kaba ha First Ground, Polo.
Ka Laitkor ka la ïoh ei shi kol lyngba ka jingbakla thep hi da u rangïalehkai ka Mawlai ha ka minit kaba 22 bad kawei pat lyngba u Sandy Kharkongor (35′), katba u Kevin Rymbai (27′) bad u Banskhemlang Mawlong (58′) ki la lah ban pynïakhaid kylla na ka bynta ka Mawlai.
Lada ka Mawlai ka la lah ban jop hynne ka sngi kan jin da la rah shisyndon ïa ka nam lahduh wat la ka dangsah sa kawei ka jingïakhun kaba khatduh. Pynban da kane ka jingïakhaid ka la pynlong ba kan hap ban ïakhun tyngeh pyrshah ïa ka Shillong Lajong FC kaba don ha ka kyrdan ba-ar jong kane lympung. Ka Lajong kaba don 42 poiñ, kan donkam ban pynliem ïa ka Mawlai (45 poiñ) na ka bynta ban rah ïa ka trophy ha ka sien kaba san, katba ka Mawlai kan donkam tang ban ïakhaid ban ïoh rah ïa ka nam lahduh lai sien lynter.
Lyngba kane ka jingïakhaid ka Laitkor ka la lah ban pynneh ïalade ha ka kyrdan basan ryngkat 25 poiñ hadien hynñiew tylli ki jingjop, ïakhaid saw sien bad shah rem hynñiew sien.
Ka jingïalehkai ha ka Sngi Ba-ar kan long hapdeng ka Nongthymmai SC pyrshah ïa ka Rangdajied United FC ha ka por 3 baje nohphai sngi. Kine ki kynhun ki la don ha ka kyrdan khyndai bad balai. Te kumta ki donkam ban ïalehkai bha ha kane ka jingïakhun kaba khatduh khnang ban ïoh ïa ki lai poiñ.
