Shillong, Lber 11
Ka Sputnik Cricket Club ka la pynliem noh ïa ka Raj Bhawan da 6 wiket na ka bynta ban ïoh jingjop ha ka Super Division Shillong Cricket League 2024-25 ba la pynïaid da ka Shillong Cricket Association ha ka Sngi Ba-ar.
Ha kane ka jingïakhun kaba la long ha madan Polo, ka Sputnik kaba la jop ïa kynting pisa, ka la ailad shwa ïa ka Raj Bhawan ban tied nyngkong ha kaba ka la ïoh 121 run bad shah pynhap 10 wiket ha ki 30.2 over. U Ankit Kumar u la tied 32 run na 32 bol bad u Joydeepan Deb u la ïoh 23 run na 38 bol. Katba u Avinav Choudhury u la shim 5 wiket bad 2 wiket da u Md Nafees Siddique na ka bynta ka Sputnik.
Haba wan shimti ïa ka pali ba ar, ka Sputnik ka la lah ban kynjoh sha ka thong da kaba ïoh 123 run bad shah pynkhyllem 4 wiket ha ki 17.3 over. U Swarajeet Dad u la khyrwit ïa ka shiteng spah kaba 57 run na 45 bol bad u Ashif Khan u la ïoh 19 run na 21 bol. Katba u Roshan Ram bad u Robin Chettri ki la shim mar shi wiket na ka bynta ka Raj Bhavan. Ïa ka nam ‘Player of the Match’ la ïohpdiang da u Avinav Choudhury uba la tied 18 run bad shim 5 wiket.
