Ka jingwan jong ki kam pynroi khamtam lei haba phai sha ka jingpynheh ïa ki surok, ki lynti-syngkieñ ka la long shisha ym tang ka jingkyrkhu ne ka jingkiew jong ki shnong ki thaw hynrei ka long ruh ka bynta kaba pynsuk shikatdei eh ha ka leit ka wan. Ngi ïohi ba ka jingdon ïa ki surok khamtam kiba heh, ym tang ka pynsuk ha ka leit ka wan hynrei ka pynkloi ruh ban pynpoi sha ki jaka ba thmu ban leit. Ka nuksa haba phai sha ki surok kum ka by-pass ne ka four-lane. Ngi lap ba ka dheng kali ne ka jingkhapngiah kam don satia ha kum kine ki surok lait noh tang lada don ka jingsniew jong ki kali hapdeng surok ne kiwei pat ki jingjia. Kine ruh ym dei ba ki pynkhapngiah manla ka sngi hynrei tang hateng-hateng.
Ka jinglong-jingman jong ki surok ha nongbah Shillong ruh na kaei kaba la ju don ha ki shiphew arphew snem mynshwa, ka la kylla, ha kaba la don ki bynta kiba la pynheh da ka jingthmu ban weng ïa ka jingkhapngiah bad pynsuk ïa ka leit ka wan bad ha kaba sdang la ïohi ba ka la long shisha ka jingmyntoi kaba khraw. Ki nongleit nongwan ruh ki la pynhiar mynsiem ba la kham suk. Hynrei kat nangïaid ki snem bad ki por, la i pynban kane ka jingpynheh surok kam shym la long ban ai jingshakri ha ka ban pynsuk ïa ka leit ka wan. Ka la long pynban kum ka lad ban ïeng sahuh jong ki kali. Kan don jingmut aiu ban pynheh surok, lada ki kali kiba ïaid kin hap hi ban ïaid kum ha ki por kiba la leit noh, naba ïa ka bynta kaba la pynheh, imat i kumba la leh na ka bynta ban ailad ïa ki kali ban ïeng sahuh.
Lada ngi phai sha ka bynta jong ka Khyndailad, ka jingheh jong ka surok ka la long kaba itynnad khamtam lei haba la thung da ki dieng napdeng kaba pynïakhlad arliang. Ka jingitynnad ka la jah noh, hadien ba ha ka bynta ka surok na Khyndailad kaba kiew shaneng sha la ïohi ba ka jingpynïeng kali ka la long ha baroh arliang bad la shu lait beit thik napdeng ïa ki kali ban ïaid. Ka jingailad ïa ki kali kamai ban ïeng sahuh khlem da pynbeit lain ruh ka la long kawei na ki daw jong ka jingkhapngiah jong ka bynta ha Khyndailad. Khamtam lei ka jingpynïeng ban pynhiar bad kyntiew ïa ki nongleit nongwan, kaba la shu pynïeng ha katba mon khlem da pyrkhat shuh ïa kiwei pat, ka dei ruh kawei na ki daw ka jingkhapngiah.
Ym dei satia tang ha Khyndailad, haba phai sha kino-kino ki jaka ba la pynheh surok, ka long pynban ka lad ka kabu ba paka na ka bynta ki nongñiah kali ban pynïeng sahuh. Hato ka jingpynheh surok, ka dei beit thik ban ailad ïa ki kali ban ïeng sahuh. Ngi donkam ban ïa shai khnang ba ngin tip. La shah ne em ban ïeng ne pynïeng harud haba leit ban pyndep ïa la ki kam ki jam.
Haba phai pat sha ka rukom ïeng ne pynïeng kali jong ki nongñiah kali ha kino-kino ki bynta jong ka surok, ka la long shisha ka bym itynnad satia namar kiba bun ki ïeng ne pynïeng kat haba ki mon, khlem da pyrkhat shuh ïa kiwei kiba leit ba wan. Tang ba la biang ïalade kam pher lada kiwei ki mad jingeh ruh. Ngim tip shuh shano ki buh ïa kata ka jingïa pyrkhat lem ne pyrkhat markylliang bad ban don ka jingsngew lem na ka bynta kiwei. Kaba kham i jaboh ka dei ïa kito ki kali kiba thied jingthied na ki dukan harud surok, ki pynïeng beit ha la ka jong ka mon, lada dei ba ka surok ka don sha ka liang ka mon bad ki ïaid na ka liang ka diang ruh kim salia ban khun beit sha ka mon ban ïeng hakhmat dukan khlem jingsalia ne pyrwa tang ba la biang ïa lade. Teng teng lei imat da dei ba long ban rung wat hapoh dukan ruh, imat kine ki kali kin rung beit.
Kat nangïaid ki por ki snem bad kat nangkiew ka jingstad, da peit pat ïa ka rukom leh, ym i kop shuh, i pynban kumba ngi dang ïaid shadien bad hiar arsut ha ka jingmut jingpyrkhat ne ka jingïatip lem ne ban don ïa kata ka jingïaburom mar kylliang.
