Bhubaneswar, Lber:
Naba ka jingtohkit halor ka jingkynnoh pynïap ïa ki arngut ki nongïalam ka BJP ha Sambalpur ka suki, u Myntri Rangbah u Mohan Charan Majhi, ha ka jing-leit jngoh ïa katei ka nongbah ha ka sngi Thohdieng mynshem taïew, u la ïakynduh ïa ki bahaïing jong utei ba la khlad noh bad pynthikna ïa ki, ba kan sa tohkit bniah ha ka lynti kaba dei ban pynthikna ha ka ban pynïoh ïa ka jingbishar bahok.
Haba kren bad ki lad pathai khubor, u Majhi u la ong wat la ha kaba sdang la pyrkhat ba ka dei ka jingjia tyngkhuh kali ha surok, hynrei ka rukom ba ka la jia ka la pynmih ïa ka jingsuba hapdeng ki bahaïing-bahasem jong utei u briew ba la khlad noh ba ka dei ka jingthombor ba la thmu lypa.
“Nga la ïakren bad ki bad pynthikna ba yn pynlong ïa ka jingtohkit kaba biang katkum ki jingkynnoh jong ki. Nga la ïakren ruh bad ki bor pulit ha kane ka liang. Lada don kano kano ka jingthmu, yn sa pynpaw bad yn sa pynïoh ïa ka hok”, la pyntikna u Myntri Rangbah.
Kine ki nongïalam kiba la shah pynïap, ki dei ki President jong ki Mandal jong ka BJP, u Debendra Nayak bad u Sarpanch barim u Muralidhar Chhuria, ha kaba ha ka 5 tarik, Kyllalyngkot, ki la ïap ha ka jingtakhuh kali hadien ba kawei ka trok Tipper, kaba la thep da u Fly Ash, ka la tynrah ïa ka kali jong ki, na kawei ka jingkieng kaba don hapoh u pud u sam jong ki pulit Burla. Kane ka jingjia kaba la paw ha kaba sdang kum ka jingjia aksiden ha surok, hynrei hadien la pynthikna ba ka dei kaba la thmu, ka la pynlong ïa ki pulit ban buh jingmudui ïa ka mukotduma pynïap briew hapoh ki kyndon ba ïadei jong ka BNS.
U nongñiah kali uba shah kynnoh, u Prasanna Jenamani, u la shah kem tang hadien katto katne kynta ba la jia katei ka jingjia bad u la leh ruh ïa ka Polygraph Test bad nalor kane u la shah set na ka bynta ka jingtohkit.
Wat hapdeng kine ki jingjia, ka jingbym don ka jingmyntoi kaba lah ban ïohi ha kane ka mukotduma naduh ba la pynlong ïa ka Polygraph Yest ha ka 7 tarik u Rymphang, ka la pynmih ïa ka jingbym sngewhun jong ki paidbah bad ka jingsuba ba ka don ka jingleh bymman.
Ki bahaïing jong ki nongïalam kiba la khlad noh ki la kynnoh ba ka don ka jingthmu kaba kham shyrkhei bad ka jingdonkti jong kiwei pat ki briew, ka jingkynnoh kaba la ïathuh ba u Myntri Rangbah u la mynjur ha ka jingïakynduh jong u bad ki.
Kane ka mukotduma ha kaba sdang ka la nang jur bha da kaba lum jingtip lyngba ki CCTV, kiba la pynshisha ba katei ka jingshah tynrah kali ka dei kaba la thmu ne mut lypa.
Nalor kata, u nongñiah kali ba shah kynnoh ruh, u la kam ba u la tynrah ïa ka kali lai sien. Hynrei ka jingbym don ki jingtip ba kham bniah ka la pynmih ïa ka jingsngewkhia ba la thmu ban pynsangeh ïa kane ka mukotduma.
Ban bynrap shuh shuh, ka jingleh slem jong ki pulit ka distrik ka la pynmih ïa ka jingkulmar kaba nang jur hapdeng ki paidbah, ha kaba bun ki buh jingkylli ïa ka jingtreikam bad ka jingthmu kaba don ha lyndet jong ka jingtohkit.
Katba ki heh pulit ki dang sngap jar, ym shym la don kano kano ka jinglap kaba paw ne kem shuh hadien shibnai hadien ka jinglap ba nyng-kong.
Ka jingpyrshang ban ïoh ïa ka jubab na u SP ka Sambalpur, u Mukesh Bhamoo halor kane ka kam ka la long lehnohei.
