Shillong, Lber 11
Ka BJP Meghalaya ka pyrshah jur halor ki jingpyrshang ka Sorkar ban pynkut noh ïa ka komiti ba marwei, kaba la khlieh da u Justice (Retd.) B.P. Katakey, kaba khmih bniah haba ïadei bad ki jingkynnoh tih dewïong be-aiñ hapoh ka Jylla.
U nongaiktien rangbah ka BJP ha ka Jylla, Bah Mariahom Kharkrang u la ong ba ïa ka komiti la thung da ka Ïingbishar ba ha khlieh duh ka Jylla bad ka long kaba donkam ba ka ‘Panel’ kan rah ïa ka jingtohkit sha ka jingpynkut kaba don jingmut.
“Ka jingpynkut noh ïa ka ‘Panel’ ha kane ka por ka long kumba khanglad ïa ka hok bad ïa ka jingshisha ban paw pyrthei sha ki paidbah. Ha ka jaka ban weng ïa u, ka Sorkar ka dei ban sngewkhia ha ka ban wad ïa ki briew kiba don bynta ha ki kam tih bad shalan dewïong be-aiñ,” ong u Bah Kharkrang.
U la ong ruh ba kum ka seng kaba kyrshan ïa ka jinglong khuid ha baroh ki liang jong ka jingim paidbah, ka BJP-Meghalaya kam ïahap satia halor ka jingthmu ka Sorkar ban pynkut noh ïa ka jingshakri jong u Justice (Retd.) B.P. Katakey.
Shuh shuh u la bynrap, “Ka State Unit jong ka BJP ka la thaw ruh ïa ka ‘Panel’ ban tohkit halor ki jingkynnoh tih dewïong be-aiñ ha ka Jylla jong ngi. Ïa ki jinglap ka jingtohkit jong ngi yn sa aiti sha ki nongïalam ka Sorkar Pdeng ynda la dep,” pynkut u Bah Kharkrang.
Kum ban shu kdew hangne, ka Sorkar ka la sdang ban ïa pyrkhat halor ka jingmut ban pynkut noh ïa ka jingshakri jong u Justice (Retd) B.P. Katakey uba khlieh ïa ka komiti ba marwei ba la thung da ka Ïingbishar ba ha khlieh duh ka Jylla halor ka kam kaba ïadei bad ka jingtih dewïong be-aiñ ha kane ka Jylla.
