Shillong, Lber 11
Kumba 200 ngut ki dkhot jong ka seng Khasi Students’ Union (KSU) ha ka step Sngi Ba-ar ki la leit tur sha Ïingdorbar Thaw Aiñ jong ka Jylla katba ka Dorbar Mang Tyngka ka dang ïaid. Hynrei ïa kine ki spah ngut ki dkhot KSU la khang lynti noh da ki pulit bad ki bor pynïaid district kiba la don lypa ha ka lad ba don ka jingkieng Harrison.
Kane ka jingleit tur jong ki dkhot ka KSU da kaba ïaid paidbah ka long ban pyrshah ïa ka jingthmu jong ka Sorkar ban mynjur ïa ka jingpynkylla ha ka Meghalaya State Investment Promotion and Facilitation (MSIPF) Act, 2024 bad ban wanrah ïa ka lynti rel ha ki thaiñ Khasi-Jaiñtia.
Kine ki dkhot ka KSU kiba rah lang ïa ki lama jong ka seng, ki banar bad ki plakad, ki la pyrta ruh pyrshah ïa ka MSIPF bad pyrshah ïa ka jingthmu wanrah ïa ka lynti rel.
Na ka liang ki dkhot jong ka KSU ki la dawa na ka Sorkar ban pynsangeh noh shisyndon ka jingpyntreikam ïa ka aiñ MSIPF da kaba kam ba kane kan ai bor ïa ka Invest Meghalaya Authority (IMA) ba kan thied bad ban ai jaka ïa ki nongseng kam ba nabar, kaba long pyrshah ïa ka nongrim jong ka Meghalaya Land Transfer Act.
U President ka KSU, Bah Lambokstarwell Marngar u la ong ba kane ka jingleit jong ka seng ka long ban pynpaw ka jingpyrshah kaba jur ïa ka jingthmu ban wanrah jingpynkylla ha ka aiñ MSIPF. U la ong ba na ka liang ka seng ka la dep phah da ka jingthoh ban ai jingmut sha ka Sorkar, hynrei kumba ka long u Myntri Rangbah u la wanrah ïa kane ka aiñ ban pynkylla hapoh ka ïingdorbar.
“Ngi dang khmih lynti ba ka Sorkar kan wanrah ka aiñ ban ïada ban kyntiew ïa ki trai ri trai muluk, ngi khmih lynti ba ki nongthaw aiñ kin wanrah ïa ki aiñ kiba lah ban tei ban ïarap shisha ïa ka Jylla, hynrei kumba long ki wanrah ïa ki aiñ kumno ban leh ïa ki kam beaiñ, ba pynïaid tang katto-katne ngut ki briew bad ym don mano-mano ba lah ban ujor ïa ki. Dei halor kata ka nongrim ba na ka liang ka seng ngi la wan ban pyrshah, ngi la mut ban tur shaduh shatei, hynrei ngi dang ïaid da ka lynti ba jai-jai bad lada ka Sorkar ka dang sngap mynthi ngin sa shim da kiwei pat ki lad ki lynti”, la ong u President KSU.
