Shillong, Lber 11
Ka tnad Housing ka Sorkar Jylla kan bteng ïa ka jingshakri jong ka ha ka ban pynbiang ïa ki ïing ki sem (kiba biang) bad ban long ka atiar ka ban ïarap kyntiew ïa ka jingim jong kiba duna ha ka ïoh ka kot.
Ïa kane la ong da u Myntri ka tnad, Marcuise N. Marak ha ka Sngi Ba-ar – kaba dei ruh ka sngi kaba phra jong ka Dorbar Mang Tyngka ka Jylla haba jubab halor ka jingïatai ba lyngkot ba la wanrah da u MLA ka Mawryngkneng, Bah Heaving Stone Kharpran halor ka mat kaba ïadei bad ka Chief Minister’s Housing Assistance Programme (CMHAP).
U Marak u la ong ba ka tnad ïa mynta ka dang pyrshang katba lah ban sngewthuh ïa ki jingeh bad ban wanrah ïa ki lad ki lynti kiba kham bha ban pyntreikam ïa ki jingmut kiba thymmai ban pynbha ïa ka jingtreikam ka tnad.
“Ka tnad ka dang pynkhreh ïalade bad ka pdiang ïa ki buit thymmai ryngkat ki lad ki lynti kiba kham bha ban kynjoh ïa ka thong jong ka, kumjuh da kaba buh jingmut halor ka bha ka miat jong kiba duna ka ïoh ka kot ha ka Jylla ban bteng ïa ka jingshakri jong ka – khnang ban pynbiang ïa ki ïing ki sem kiba biang bad ban long ka atiar ban ïarap kyntiew ïa ka jingim bad ka burom jong kiba duna ka ïoh ka kot,” u la ong.
U Myntri u la ong ruh ba ha ryngkat ki jingkylla ka por, ka tnad ka la pynkhreh ruh ban kynthup ïa ka jinglong-jingman ha kaba ka roi ka par ka ïahap bad ki jingdawa kum ka jingpynneh-jingpynsah, ka jinglah ban urlong bad ka sienjam kaba ïadei na bynta ka jingmyntoi jong ki nongshong shnong.
“Nga kyrmen ba kine ki jingpyrshang lyngba ka tnad Housing kin ai jingmyntoi ïa ki briew jong ngi ha ki jaka nongkyndong bad ha sor kumjuh,” u la ong.
U Myntri u la pynkynmaw ruh ba ka tnad mynshuwa ka la pyntreikam ïa ka Rural Housing Scheme (RHS) ha kaba la ai lai ban ka tin sop ïing (CGI) kum ka ‘Grant-in-Aid’ sha kito kiba la lah ban tei ïa la ka jong ka ïing haduh ka kyrdan jong ka tnum ha ryngkat ki jingdon-jingem jong lajong. Baroh ki don 71,632 ngut ki nongïoh jingmyntoi kiba la ïoh jingmyntoi na ka RHS.
Hynrei, u la Marak u la ong ba ka skhim kam long kaba sngewhun naba la ai tang sha khyndiat ngut ki nongaplai na kawei-kawei ka distrik – ka bym ïahap pat ïa kito kiba hap ban ap da ki snem ban ïoh jingïarap lyngba kane ka skhim bad la sngew donkam ban kham pynsuk da kaba buh jingmut ïa ka jingkha roi jong ki longïing kiba thymmai bad ka jingdawa kaba la ïoh pdiang.
“Bad kumta, ka Sorkar ka la rai ban pynsangeh noh ïa ka skhim bad ha ka jaka jong ka, la wanrah ïa ka Chief Minister’s Housing Assistance Programme (CMHAP) ban bujli ïa ka RHS. Ïa ka CMHAP la sdang ha u snem 2017 bad la pyntreikam naduh u snem 2017-18 ter-ter. Kane ka skhim ka kynthup lang ïa ki jaka nongkyndong bad sor jong ka Jylla lyngba ki C&RD Block bad ki jaka sor/Municipal mar kylliang,” pyntip u Marak.
U la ong ruh ba ki jingthmu jong ka CMHAP ki long ban pynbiang ïa ki tnum kiba neh bad ban pynbha ïa ki ïing kiba la don lypa sha ka bynta jong ka imlang-sahlang kaba duna ha ka ïoh ka kot (Economically Weaker Section – EWS) da kaba ai sha ki lai ban ka tin sha ki nongïoh jingmyntoi ba la jied bad ban pynbiang ïa ki ïingsah sha ki longïing kiba duna ka jingïoh (Low Income Group – LIG) kiba sah ha ka Jylla da kaba ai ka jingïarap pisa kaba T.75,000 sha man la ka longïing.
Na ka liang u Myntri u la pyntip ba mynta, ka tnad ka dang ai tang ïa ka bynta banyngkong – kaba ai ïa ki tin sop ïing sha ki nongïoh myntoi EWS katkum ka thong ha man la ki C&RD Block bad ki jaka sor/Municipal.
Ïa mynta, ka bynta ba ar jong katei ka skhim ym pat lah ban pyntreikam, u la ong.
Ha kawei ka liang, u la ong ba ka jingïarap pisa kaba T. 75,000 la ai na ka bynta ki ïingsah sha ki longïing LIG na ka bynta 130 ngut ki nongïoh myntoi hapoh ka South West Garo Hills ha u snem 2017-18 (100 ngut na bynta ka Betasing C&RD Block bad 30 ngut na bynta ka Damalgre C&RD Block).
