Shillong, Lber 12
Ka jingïalehkai bha u rangapkol Gianluigi Donnarumma ha ka tie-breaker ka la pynlong ïa ka Paris Saint-Germain (PSG) ban jam sha ka quarter-final ha ka Champions League hadien ka jingïakhun kaba tyngeh pyrshah ïa ka Liverpool.
Wat la ha ka wat kaba nyngkong ka PSG ka la shah rem noh da 1-0 kol ha ka Liverpool. Hynrei ha kane ka jingïakhun jong ka wat ba ar ka la long da khongpong ha kaba ka PSG ka la jop kylla lyngba ka kol u Ousmane Dembele na ka bynta ban ïakhaid ha ka aggregate. Te kumta kane ka jingïalehkai ka la poi sha ka extra time, bad u Donnarumma u la lah ban pynpaw ïa ka jingtbit da kaba kyrda na ka jingshah thep kol na ka bynta ban pynlong ïa ka PSG ban ïoh jingjop.
Kumjuh ka Barcelona ka la jam sha ka quarter-final hadien ba ka la tam da 4-1 ha ka aggregate ïa ka Benfica. Na kine kol, ar kol la thep da u Raphinha bad kawei pat la thep da u Lamine Yamal na ka bynta ban pynlong ïa kane ka kynhun ban jop da 3-1 kol ha ka jingïakhun jong ka wat ba ar. u Yamal uba long u nongïarap ba hakhmat eh jong ka kynhun, u la kylla long kum rangïalehkai ba dangkhynnah tam ban pynïoh ïa ka jingjop ha ka Champions League.
Kumjuh ka Bayern Munich ka la tam ïa ka Bayer Leverkusen da 5-0 lyngba ka aggregate hadien ba ka la jop da 2-0 kol ha ka jingïakhun jong ka wat ba ar.
Wat la kine ki kynhun kim shym la lah ban pynkhih jar ha ka kylla step, hynrei ka Bayern ka la ïoh ban thep kol ha ka kylla miet lyngba u Harry Kane (52) bad kawei pat na u Alphonso Davies (71) na ka bynta ban pynlong ïa kane ka kynhun ban jam biang sa shisien sha ka quarter final jong kane ka lympung.
Haba phai sha kawei pat ka jingïakhun, ka Inter Milan ruh ka la jam sha kawei pat ka wat jingïakhun hadien ba ka lah ban tam ïa ka Feyenoord da 4-1 ha ka aggregate. Kane ka la wan urlong lyngba ka jinglah ban thep kol na u Marcus Thuram lem bad ka penalty na u Hakan Calhanoglu ka la biang pura ïa ka Milan ban jop da 2-1 kol ha ka wat ba ar.
Te kumta ha ka quarter-final ka PSG ka lah ban ïakynduh pyrshah ïa ka Aston Villa lane ka Club Brugge, ka Barcelona ïa ka Borussia Dortmund lane ka Lille, katba ka Bayern Munich kan ïakynduh pyrshah ïa ka Inter Milan ha ka wat kaba nyngkong ka ban long ha ka 8 tarik u Ïaïong bad ka wat ba ar ha ka 15 tarik jong ujuh bnai.
