Shillong, Lber 12
Ka Exporter XI bad ka Sohra Labour Union ki la ïoh jingjop ha ka Inter Office cum Corporate League T20 Cricket Tournament 2025 ba la pynïaid da ka East Khasi Hills Cricket Association ha ka Sngi Balang.
Ha kane ka jingïakhun kaba la long ha madan Saitsohpen kaba ha Sohra, ka Exporter XI ka la pynliem noh ïa ka NIT Meghalaya da 6 wiket. Ka NIT Meghalaya kaba la kam trai ban tied nyngkong ka la ïoh 172 run bad shah pynhap 5 wiket ha ki 20 over. U Holding Mewell Surong u la long kum nongtied ba ïoh buh da kaba ïoh 38 run na 38 bol. Katba u Mehraf Hussain Sarkar u la shim 2 wiket ha ki 4 over.
Haba wan shimti ïa ka pali ba ar, ka Exporter XI ka la lah ban kynjoh sha ka thong da kaba ïoh 173 run bad shah pynhap 4 wiket ha ki 18.4 over. U Swapon Chakraborty u la tied 45 run na 35 bol. Katba u Holding Mewell Surong u la shim 1 wiket ha ki 2 over. Ïa ka nam ‘Player of the Match’ la ïohpdiang da u Shubro Sarkar.
Haba phai sha kawei pat ka jing-ïakhun ba ar, ka Sohra Labour Union ka la jop da 71 run (DLS method) ïa ka Sohra Post Office. Ka Sohra Labour Union kaba la jied ban tied nyngkong ka la ïoh 228 run ha ki 20 over. U Pherson Diengdoh u la long kum nongtied ba ïoh bun da kaba ïoh 106 run na ki 60 bol.
Haba wan beh ïa ka thong ka Sohra Post Office ka la ïoh tang 93 run bad shah pynhap 6 wiket ha ki 14 over. U Kevinstar Khongwar u la tied 32 run na ki 42 bol. Katba u Risking Nongjiej u la shim 3 wiket ha ki 2.5 over. Ïa ka nam ‘Player of the Match’ la ïohpdiang da u Pherson Diengdoh.
