Shillong, Lber 12
Ka Jingïaseng KJP Synod Pdeng kaba 1 (Nyngkong) kan long ha ka Balang Presbyterian Umlyngka naduh ka 13 tarik Lber haduh ka 16 tarik Lber 2025. Ka jaka long Jingïaseng ha ka Sngi U Trai kan long ha ka jaka ki Kur Thangkhiew Busla kaba don ha ka dong Mawsyiem; 3 km na Laimer.
Ki Nongkren ha ka Sngi U Trai ha ka por 10:30 mynstep ki long u Rev. TS Wankhar, 1:30 mynsngi u Rev. LS Nongphlang bad ka Jingïaseng miet ha ka por 6:30 kan long ha ïingmane bad ban kren ïa ka sobjek Balang kaba ong, “Ka jingngeit kaba neh skhem hapdeng ka pyrthei jong ki jingkylla” ban kren da u Rev. HK Nongbsap. Ka Balang Presbyterian Umlyngka ka khot sngewbha ïa baroh ki paid riewngeit ban ïa wan sha kane ka Jingïaseng ha ka Sngi U Trai ka 16 tarik Lber 2025.
Na ka bynta ka jingbit jingbiang jong ki nongwan Jingïaseng, na ka liang ka Balang ka la pynbeit kumne, ba ki kali rit kiba wan na ki thaiñ ka Khadar Balang Presbytery, Mylliem Presbytery, Mawkynrew Presbytery, Lum Rapleng Presbytery bad Shillong Sepngi Presbytery kin wan beit na Sanmer, Mawklot,, Nongumlong bad poi sha Umlyngka, bad ki bos kiba wan na kine ki Presbytery kin wan beit na 3 mer, Entry No.1.
Kiba wan na Laitumkhrah Presbytery bad na kiwei pat ki jaka kin wan beit na surok bah lyngba ka Entry No. 1. Ki bos ki ban wan sha kane ka Jingïaseng kin ïeng (Parking) ha syndah jong ka Community Hall jong ka shnong Umlyngka. Na ka bynta ki kali rit kum ki Sumo bad kiwei kiwei pat ki kali rit kin ïoh ban ïeng (Parking) shaduh jaka long jingïaseng bad ka por ban shah ban rung shaduh jaka long jingïaseng kan long hapoh jong ka 10 baje mynstep bad palat ïa katei ka por kin ïoh ban ïeng kham pajih na jaka long jingïaseng Synod.
Kum ka Balang ka kyrpad ïa baroh ki ban wan sha kane ka jingïaseng ba kin burom ïa ka jingpynïaid jong ki Traffic Police/Volunteer khnang ba kan ym don kano-kano ka jingsahkut kali. Ka Balang ryngkat ka jingïatreilang bad ka Dorbar Shnong Umlyngka ka la pynbeit ruh ban ym shah ban die jingdie ha shilynter ka surok shnong haduh ka jaka long jingïaseng khnang ba kan ym don ka jingpynwit ïa ka ïaid ka ïeng jong ki nongwan jingïaseng.
