Shillong, Lber 12
Ka Thma U Rangli-Juki (TUR) ka la lap ba ki don tang lai tylli ki ‘file’ hapoh ka tnat treikam bathymmai ba tip kum ka Meghalaya Investment Promotion Authority (MIPA), kaba dei ka tnat ka ban wanrah ïa ka Aiñ haba ïa dei bad ka seng kam seng jam hapoh ka Jylla.
Ha ka kyrwoh ba la phah da ka Kong Angela Ryngad kaba dei ka President jong ka TUR, ka la ong ba katkum ka RTI ba ka la pan na kane ka tnat treikam bathymmai ka Meghalaya Investment Promotion Authority, ka TUR ka shem ba don tang lai tylli ki file ha katei ka ophis treikam.
Ka TUR ka la pyntip ruh ba ïa kine ki kot ki sla, ki dulir, ki note sheet bad kiwei kiba lah ban ïoh na katei ka ophis treikam jong ka Seng ne ki lah ban peit napoh ka ‘website’ kaba ki la ai kyrteng ‘hokmeghalaya.in’
“Ha ka por ba ngi leit buh ïa ka ‘application’ RTI ngi shem ba don tang shi kynhun ki nongtrei kiba trei kum ki consultant bad ki bym tip ei-ei shaphang ka kam ba ki trei bad ki ong pynban ïa ngi ba ki hap ban ai kaiphod ïa baroh ki kam ba ki trei sha uwei u ophisar uba kyrteng Bah K. Hynñiewta jong ka Planning Department,” ka la ong.
Ka Kong Angela ka la ong ruh ba kane ka tnat treikam bathymmai ka dei ka tnat kaba mih na ka Aiñ ba la wanrah ha u bnai Rymphang 2024 bad la mynjur bad pynlong aiñ ïa ka ha u bnai Lber 2024, khlem da don kano-kano ka jingïatai hapoh ka Ïing Dorbar Thaw Aiñ. “Kane ka Aiñ ka buh jingma ïa ka jylla bad ka jingthmu kaba paw ha ki kyndon jong ka, ka long kaba mynsaw bad kan buh jingeh ïa ki trai shnong jong ka jylla, kiba dei ki trai jong ka khyndew ka shyiap,” ka la ong.
“Ha ka kyrteng jong ka roi ka par bad ban wanrah ïa ki kam pynroi lyngba ka seng kam seng jam, kane ka Aiñ ka thmu ban kurup lut ïa ka bor ban pynïaid ïa ka khyndew ka shyiap bad ka ai bor tang ïa ki katto-katne ngut ki ban batai bad rai ki jait kam aïu ban seng ne mano ban bei tyngka ha ka Jylla,” ka la ong. Ka Kong Angela ka la ong ruh ba kane kan khynñiat sharud ïa ki trai shnong na ki kam pynroi bad nang pynduh ïa ka jinglong trai halor ka khyndew ka shyiap da ki trai shnong trai muluk.
“Kane ka Aiñ thymmai ym tang ba ka buh jingma bad pynduh bor ïa ka Land Transfer Act, hynrei lada pyntreikam pura ïa ka, ki lah ban pyndonkam bakla ïa ka tang da ki katto-katne ngut kiba bat ïa ka bor synshar ki ban sa pyndonkam ïa ka na ka bynta ban myntoi shimet bad ban lum spah ïalade,” ka la ong.
Ka Kong Angela ka la ong ruh ba ka Sorkar Jylla ka khohreh ban pyntreikam ïa ki ‘project’ bapher-bapher lyngba ka Meghalaya Investment Promotion Authority ha ka kyrteng jong ka roi ka par bad ban pynlong ïa ka Jylla ban poi sha kata ka thong ban roi haduh kumba 10 billion dollar ha ka ïoh ka kot, khlem ki kyndon ne jingteh kyndon kiba biang ban ïada ïa ka jinglong trai halor ka khyndew ka shyiap da ki trai shnong, khlem ki kyndon ban ñiewkor bad ban pynneh-pynsah ïa ka mariang, ban ïada bad kyntiew ïa ki nongtrei nongbylla kane ka Aiñ ka buh ïa ka Jylla bad ki nongshong shnong ha ka jingma kaba shyrkhei.
“Ka TUR ka pyrshah jur ïa kane ka Aiñ bad ïa ka rukom treikam kaba sop-sop jong kane ka tnat treikam kaba long pyrshah ïa ka synshar paidbah, kumta ngi dei ban pynkhlaiñ ïa ka synshar paidbah bad ngi dei ban pyndam shi syndon ïa ka jinglah shiliang ha ka ïoh ka kot hapdeng ki nongshong shnong ka Jylla,” ka la pynkut.
