Shillong, Lber 12
U Myntri ka tnat Pule-Dangle ka Jylla, Rakkam A Sangma u la pyntip ba ka Sorkar Pdeng ka la dep ban mang ban tei ïa ki 38 tylli skul Eklavya Model Residential Schools (EMRS) ha ka jylla baroh kawei.
Ïa kane u Myntri u la pyntip haba jubab halor ki jingkylli ba la wanrah da ki MLA ka liang pyrshah ha ki kynta kylli jingkylli jong ka dorbar mang tyngka kaba la long ha ka Sngi Balang bad u la pyntip ruh ba la dep ban buh ka jingtyrwa ban tei ïa ki saw tylli Center of Excellence for Sports bad mynta dang ap ban ïoh ïa ka jingmynjur na ka Sorkar Pdeng.
U Myntri u la pyntip ba napdeng 38 tylli ki EMRS, don 5 tylli kiba la mad ïa ka jingeh ban ïoh ïa ka jaka bad kane ka kynthup ha Laitkor Block, Mawryngkneng Block, Mylliem Block, Umsning Block bad Laskeiñ Block.
Shuh shuh na ka liang jong u Myntri u la pyntip ruh ba haduh 16 tylli ki projek ki la ïaid shakhmat bad 7 tylli ki dang don ha ka lynti jong ka jingpynkhreh ïa ka Detailed Project Report (DPR). U la pyntip ruh ba haduh mynta, ka jingtei ïa ki ar tylli EMRS ha Samanda bad Pahamsyiem ki dei ba la pyndep ïa ka jingtei baroh.
“Ngi dang tynruh ïa ka Ministry ba kan sdang noh ban pyntreikam ïa ki,” u la ong.
Halor ka jubab ba la ai da u Myntri ha kaba ïadei bad ka jingeh ha Mawryngkneng Block, u MLA ka Mawryngkneng Bah Heavingstone Kharpran u la kyntait ba kam shym la don kano-kano ka jingeh ha kaba ïadei bad ka jaka ha Mawryngkneng khamtam haba ka Dorbar Shnong ka la dep ai ïa ka NOC bad ki ophisar ka tnat pule dangle ki la dep ban pynlong ïa ka jurip.
Halor kane, na ka liang u Myntri u la ong ba ka tnat ka dang ap ïa ka kaiphod kaba pura halor kane ka kam.
Ha kawei pat ka jingkylli ba ïadei bad ka Tura Medical College, ka Myntri ba khmih ïa ka tnat ka koit ka khiah ka Jylla ka Kong Ampareen Lyngdoh ka la pyntip ba ka Tura Medical College ka dei ba ka Sorkar ka thrang bha ban pyndep noh wat la shibun ki jingeh kiba ka ïakynduh haba hap ban ïaid lyngba shibun ki kyndon ba pyrkhing jong ka National Medical Commission ban pynbit pynbiang ïa ka jingpyntrei ïa kane ka Medical college.
Ïa kane ka la jubab haba u Nongïalam ka Liang Pyrshah u Dr Mukul Sangma u la buh jingkylli ban pynthikna ban pyndep noh ïa kane ka projek.
Ka Kong Ampareen ka la ïathuh ba ka jingpyntrei ïa kane ka projek ka la ïaid kumba 75%. Nangta ka la ïathuh ruh ban pyntrei ïa kane ka projek la mang ïa ka jingpynlut kaba T.189 klur bad T.170.10 klur ka Sorkar India ka la bei tyngka ïa katei ka projek haduh mynta, katba ka Sorkar Jylla ka la bei tyngka T.19 klur kumjuh ka pisa ba la siew sha ka PMC haduh mynta ka long T.185.65 klur bad ka pisa ba la siew sha ki kontraktor ka long T.178.66 klur.
