Cairo, Lber:
U heh jong ka Hamas u la ong ba ka jingïakren ba thymmai jong ka Gaza ban sangeh ïasiat ka la sdang ha ka Sngi Ba-ar ha ka nongbah jong ka Qatar ha Doha, ha kaba ka jingïakhih jong ka Palestine ka la jan poi sha ka lad jingiasuk bad la khmih lynti ruh ba ki kam- ki jam baroh kin ïaid beit- ïaid ryntih kumba la thmu.
“Ka sien ba thymmai jong ka jingiakren ban sangeh iasiat ka la sdang mynta ka sngi,” la ong u Abdul Rahman Shadid ha ka kyrwoh. “Ka jingïakhih jong ngi ka ïadei bad kine ki jingïakren ha ka rukom kaba bha bad kaba don ka jingkitkhlieh.”
Ka Israel ka la phah ruh ïa ka kynhun ki nongïakren na ka bynta ka jingïakren kaba thmu ban pynjlan ïa ka jingsangeh thma kaba shipor ha Gaza, hynrei haduh mynta kam shym la kren eiei halor kane ka mat.
“Ngi kyrmen ba ka jingiakren kaba mynta kan long kaba seisoh bad ban lah ruh ban iohi ia ka bynta kaba ar,” la ong u Shadid.
U la pynpaw ruh ïa ka jingkyrmen ba u nongmihkhmat jong ka US Middle East, u Steve Witkoff, un ïarap ban sdang ïa ki jingïakren na ka bynta ‘ka bynta kaba ar’ jong ka jingïateh kular ban sangeh ïasiat.
Ka bynta ba nyngkong jong ka jingïateh kular kaba 42 sngi, ka la kut noh ha kaba sdang jong une hi u Lber hadien ba ka Israel bad ka Hamas ki la ioh ban ia pyllait mar katto-katne ki briew, kaba mut ban pynthikna ïa ka jingpynkut kaba neh jong ka thma, kaba la mih hadien ka jinghiar thma jong ka Hamas ïa ka Israel ha ka 7 tarik u Risaw jong u snem 2023.
Wat la katta, la ong ba ki don shibun ki jingiapher jingmut halor kumno ban pyniaid shakhmat ia katei ka jingiakren iasuk hapdeng ka Israel bad ka Hamas, ha kaba ka Hamas ka wad ia ka jingiakren kaba mardor na ka bynta ka bynta kaba bud jong ka jingsangeh thma ha Gaza Strip, katba ka Israel pat ka kwah ban pynjlan ia ka bynta kaba nyngkong.
Ka Hamas ka la kynnoh ba ka Israel ka la pynkylla ïa ka jingïateh kular ban sangeh thma, da kaba pynpaw ha ka jingpynbna ha ka Sngi Nyngkong ba ka Israel ka kyntait ban sdang ïa ka bynta kaba ar jong ka jingsangeh thma.
Ha shwa ka jingïakren kaba mynta, ka Israel ka la pynsangeh noh ïa ka jingpynbiang bording sha ka karkhana pynkhuid um kaba don tang marwei hi hapoh ka nongbah Gaza, ha kaba, ka Hamas ka la pynrem jur bad ong ba kane ka jingleh jong ka Israel ka long ka bym lah pdiang namar ka jingpynshitom beiñ jongka ia ki briew jong ka Gaza.
Namar la ong ba ka Israel ka la dep pynsangeh noh ïa ki lad ai jingïarap jong ki ri bad ki tnat bapher sha nongbah Gaza hapdeng ka jingïakynad ba khah-khah hapdeng jongka bad ka Hamas ha kine ki por ba la leit.
