Shillong, Lber 12
Ka kali Alto 800 kaba don ïa u registration number ML05-K-7549 kaba dei trai da u nongtrei jong ka North East Railway Rest House kaba don ha Laban bad pynïeng ha phyllaw ka ophis ka la shah thang ha ki runar ha ka por shiteng miet.
Kane ka kali ka dei jong uwei u Khasi uba trei ha katei ka jaka sah jah thait uba la buhrieh kyrteng, u la ïathuh ba u dang shu wan donkam ha ka por 10 baje mynmiet jong ka 11 tarik Lber 2025, kumta u la pynïeng ïa ka kali hakhmat ophis ban leit thiah noh.
U la ïathuh ba ha ka por 12:30 shiteng miet, u paralok u la ïohsngew ïa ka jingbthei kynsan bad haba la leit peit la ïohi ba ka kali ka la kem ding, kumta u paralok u la ïarap ban theh um bad ban leit khot ïa u na jaka thiah.
Nangta u la ïathuh ruh haba ki pulit ki la wan ki la lap ïa u bilor ‘beer’ uba sahkut hadien kali kaba don ka speaker kaba la suba jur ba u dei bilor ban pyndonkam kum u ‘petrol bom’ ban kawang nadien jong ka kali.
Shuh shuh, u la suba ba don ki briew ba wan thang ïa ka kali jong u namar ki don ki dak khah snam kiba bit ha kynroh namar ha kynroh la buh da ki bilor.Kane ka kali ka la julor katta-katta na ki bynta shadien, shapdeng bad khyndiat shakhmat. Kumjuh, ki pulit jong ka tnat CID ki la wan poi sha phyllaw ka North East Railway Officers Rest House kaba don ha Laban ban peit bniah ïa ki shympriah kti jong ki runar kiba donkti ban thang ïa ka kali jong u nongtrei kane ka jaka sah pyngngad ki ophisar railway.
Hadien katto-katne kynta, ki nongtrei ka forensic ki la wan poi ban peit bniah ïa ka snam ban lap ïa ki briew kiba donkti. Baroh ar kynhun ki la leit peit ïa ka kynroh kaba la bit snam namar la suba ba ki shah ot ha ki bilor ba la pynap ha kynroh.
