Nongstoiñ, Lber 12
Ha ka miet jong ka 11 tarik u Lber ha ka por kumba 11:30 eiei katto-katne ngut ki briew ki la leit ban thombor ïa ka ïingsah jong ka Kong Theresa Dkhar kaba dei ruh ka para trai jong u MLA ka Mawshynrut kaba don ha ka shnong Seinduli ha West Khasi Hills.
Ka tyllong khubor ka ïathuh ba kitei ki runar ki la wan ban kawang da ki maw ryngkat ki bilor pynbthei ïa katei ka ïing. Hynrei ha katei ka jingjia ym shym la don kano-kano ka jingmynsaw ïa ki briew hapoh ka ïing.
Ka tyllong khubor ba la ïoh lum la ong ruh ba ha katei ka por mar ïa ïohsngew ïa ka jingshah kawang maw, ki bahaïing jong u MLA kiba don hapoh ka ïing ki la ïamih ban peit hynrei ki runar ki la phet krad noh na katei ka jaka.
Shuh shuh ka khubor ka ong ba ha kane ka por ba ki la ïa mih ban leit peit, la shu lap ïohi pat ïa kawei ka kali kaba ki pyndonkam kaba dei ka Grand Vitara kaba don ïa u registration number ML10-D-0254.
Halor katei ka jingjia, ka trai ïing Kong Theresa Dkhar bad u Bah Alberal Thongni ki la ujor da ka ejahar (FIR) ha thanat Riangdo.
Ka khubor na u Superintendent of Police ka West Khasi Hills, u BD Marak, u la pynpaw ba ki pulit ka Mawshynrut hadien katto-katne kynta ki la ïoh kem ïa uwei suba donkti ban leit kawang maw bad bilor ïa ka ïing jong ka Kong Theresa Dkhar, nangta ki la ïoh ban kem biang sa ïa 3 ngut kiwei pat kiba suba donkti lang ha katei ka kam.
Kata, nalor u Firstbornshine Paliar, 3 ngut kiwei pat kiba la shah kem lang ki kynthup ïa u Shanbor Shangoi Syiem na ka shnong Seiñduli-1, u Skhemborlin Hoojon na Nongryngkew A bad u Silicon Swangre na Tynhiang.
Kitei baroh saw ngut ki la don ha kti jong ki pulit bad na ka liang jong ki pulit ruh ki la register ruh ïa ka case hapoh ka thanat Mawshynrut bad ka jingtohkit ka dang ïaid shakhmat.
