New Delhi, Lber:
Kumba 540 ngut ki nong India kiba la shah pynngop ha ka cyber crime network da ki jingtyrwa kam thok la ioh ban pyllait im noh na Thailand bad kiwei de ki ri. Ka liengsuiñ jong ka Indian Air Force (IAF) kaba kit ïa ki 283 ngut riewlum kiba la shah pyllait im ka la wanphai hynnin ka sngi bad ka liengsuiñ kaba ar kan wanrah biang ïa kiba sah na Mae Sot mynta ka sngi. Ym duna ia ka 42 ngut na kitei ki dei na ki jylla Telugu, ong u myntri ka sorkar pdeng u Bandi Sanjay haba iasam ia ki jingtip halor ka rukom pynphai biang ia ki briew sha la ka ri.
Kine ki trai ri ki la shah pynngop da ki jingtyrwa kam thok bad die ïa ki sha ki call centre thok kiba donkti ha ki kam thok ha ka kor kompiwtor ha Thailand, Cambodia, Laos, bad Myanmar. Ïa kine ki briew hadien la pynlong ïa ki ban pynleit jingmut ha ki kam runar ha ka cyber bad ban leh ïa kiwei pat ki kam thok ha ki jaka thok kiba treikam ha ki thaiñ kiba don harud khappud ka Myanmar bad Thailand bad la ong ba dei ki shipai jong ka Myanmar kiba la ioh ban pyllait im noh ia ki ha kane ka kynti.
Ki tnat ‘Embassy’ jong ka India ha Myanmar bad ha Thailand ki la pynthikna ïa ka jingwanphai biang sha la ka ri da ka jingïatreilang bad ki bor synshar jong kitei ki ri.
Ka Golden Triangle Region kaba don ha Southeast Asia, ha kaba ki khappud jong ka pyrthei jong ka Thailand, Laos bad Myanmar ki ïakynduh lang, ka dei ka jaka kaba jur bha ki kam runar ha ka cyber ha kaba kum kine ki jaka phone thok ki treikam.
Ka sorkar ka la ong ba ka iai maham ia kum kine ki jingleh thok kiba thmu ia ki nong India da ki jingtyrwa kam thok. Ka la ai jingmut ruh ia ki briew ban pynshisha ia ki nongpyntreikam bar ri lyngba ki mission jong ka ri India shabar ri, ki nongpynrung kam, bad ki kompeni shwa ban pdiang ia kano kano ka jingtyrwa kam kaba kum kata.
Ha u bnai Nohprah mynshem snem, uwei u nongkhaïi uba la shah kynnoh ba u la pynngop ïa ki katto-katne ngut ki samla nong India ban leh ïa kum kitei ki kam runar, u la shah kem noh na ka jylla Hyderabad ha kine ki khyndiat bnai ba la leit. Ia utei u briew la ithuh kyrteng kum u Kamran Haider, uba ju ia tip paidbah kum u Zaidi.
